Ilisimatusartorpassuit tikeraannaleqaat

Ilisimatusartut 3400-t ukiut marluk ingerlaneranni nunarput tikeraassavaat. Tassami 2007-imiit ukiut marluk Issittup Ukiorissavai. Tamatumunnga atatillugu nunatsinni suleqatigiissitamut siulittaasoq Birger Poppel ukiuni tulliuttuni pisussanut eqqarsaatersuuterpassuaqarpoq. Matumani piareersaatit pisussallu oqaluttuarai.

Siulliullugu suliassaraarput Issittup Ukiuinut tunngatillugu kalaallit danskillu iliuusissaattut siunniussat oqaasertalernissaat, nunatsinniillu pingaartinneruneqassapput inuk, pinngortitaq inuiaqatigiillu.

Tulliullugu suliassatut nunatta nunat tamat akornanni ilisimatuussutsikkut misissuinerni akuutinneqarnissaa qulakkeerniagassaraarput. Tamatumunnga atatillugu seminareqartitsinikuuvugut qulequtaralugit inuk, pinngortitaq issittumilu inuiaqatigiit. Tamatumalu kingunerai suliniutit arfinillit nunatsinnit Danmarkimilluunniit aqunneqartussat ingerlanneqassammata.

Issittup ukiuini 2007-mi 2008-milu ilisimatusarnikkut inuinnaat akuutineqarnissaat pingaartinneqassaaq suliniutillu qanoq aningaasalersorneqarnissaat suliassaavortaaq.

Suliniutit ammasumik ingerlanneqarnissaat siunertaavoq. Tamatumunnga atatillugu containerinik marlunnik pilersitsissamaarpugut, aappaa Kangerlussuarmiissaaq aappaalu nunatsinni sumiiffinni assigiinngitsuniittassaaq. Taakkunani sammisatsinnut tunngasunik pingaarnernik katersissaagut makkununnga tunngasunik: silaannaap pissusaa, sermersuaq, inuk, pinngortitaq inuiaqatigiillu.

Nunarput suliniummut immikkut aningaasaliinngikkaluartoq Ilimmarfittaassap illutai atorluarneqassasut naatsorsuutigineqarpoq. Taamaalilluta siunertarineqartoq, tassa ilisimalikkanik ingerlatitseqqinneq angusinnaaniassagatsigu, taama oqarpoq Issittup Ukiuinut siulittaasoq Birger Poppel.