Ilisimatusartoq: Uumasut mikinerpaat aalajangiisuunerpaasarput

Immap uumasuinik ilisimatusartoq Århus Universitetimeersoq, Torkel Gissel Nielsen, silap pissusaata allanngoriartornera pillugu ataatsimeersuartuni oqalugiarnermini taama oqarpoq.

Torkel Gissel Nielsen Qeqertarsuup Tunuani minngunik ukiorpanngortuni misissuisimavoq. Silaannaap kissakkiartornera ilutigalugu minngut allaanerusut amerlanerulersarput, inuussutissallu uiguleriiaattut kingulliit ilaannut tamanna annertuumik sunniuteqarsinnaavoq.

Qeqertarsuup Tunuani misissuininni minngut assigiinngitsut marluusut paasivara. Aappaa immami nillertumi sikuiuitsumit kujavartumi uumasinnaaneruvoq aappaalu kitaani immamilu kiannerusumi nalinginnaanerusoq nordsømi allaat uumasuuvoq.

Kiannerulermat aappaa mikineq kujataaniit takkuttuusoq uumalluarnerulerpoq, immap naasui kiannerusumeersut nerisarissallugit iluarinerugamigit, nalinginnaanerujartulerlunilu.

Ukiuni tullerni kiannerulernissaa takorloorutsigu ima isumaqarsinnaavoq. Minngoq nillernerani, tassa maannakkut, nalinginnaanerusoq orsoqarluartuuvoq, taassumalu inuussutissat uiguleriiaattut tulliuttut, soorlu ammassat puisit il.il., pualassusissaat aalajangertarpaalusooq.

Taanna orsukinnerusumit taarserneqarpat taava ammassat puisit allallu orsortugassakinnerulissapput. Taamaasippat uumasut tappiorannartut, aalisakkat allallu anginerusut tamaaniittut allanngussapput.

Tassa piffissap sivisunerusup ingerlanerani tamaani uumasuusut allanngoriartussapput.

Aalisakkat uumasullu qanoq ittut taamanikkussamut nalinginnaanerulissanersut maannangaaq oqaatigineqarsinnaanngikkallartoq Torkel Gissel Nielsen oqarpoq.