Ilisimatusartoq: Kalaallit Nunaat Kina-mut manngernerusariaqarpoq
- Ukiut 100-kkaat kingulliit USA-p maligassiuisimaneratut ukiut 100-kkaat tulliit Kina maligassiuisuussaaq, Damien Degeorges oqarpoq. Kinallu nunat immallu issittumiittut avannarliit eqqumaffigilersimagai maluginiarpaa, ilaatigut Issittumi siunnersuisoqatigiinni alaatsinaattutut ilaasortanngorusunnermigut.
Kalaallit Nunaata naalagaaffinngortinniarneqarnera issittumilu politikikkut inissisimanera pillugu ph.d.-tut allaaserisani Sorbonne-p ilisimatusarfiani Parisimi illersortussaavaa.
- Kinap soqutigisinnaasai tamarmik Kalaallit Nunaata pigai. Aatsitassanik piumaneqaqisunik peqarpoq, aatsitassat qaqutigoortut, uulia, gassi assigisaallu aammali imeq siunissami pingaaruteqalertussaq. Kalaallit Nunaanniillu issittup imartai ingerlaannaq tikinneqarsinnaapput. Kina Kalaallit Nunaannut soqutiginninnissaminut peqqutissaqaqaaq, Damien Degeorges oqarpoq.
Nunallu pissaanilissuup issittumut soqutiginninnera - ilisimatusarnikkut Issittumi siunnersuisoqatigiinnilu alaatsinaattutut inissisimarusunnikkut - Kalaallit Nunaata iluaqutigisinnaavaa, taamaassappalli Kalaallit Nunaat naalagaaffiusariaqarpoq nukittooq, Damien Degeorges isumaqarpoq.
- Naatsumik oqaatigalugu Kalaallit Nunaat piumassuseqassaaq nunamik pissaanilissuarmik niueqateqarniaruni. Kalaallit Nunaallu aatsitassanut politikeqarnermigut soqutiginninnerusariaqarpoq, Damien Degeorges isumaqarpoq.
- Kalaallit Nunaanni ullutsinni amigaataasorujussuaq tassaavoq aatsitassarsiorneq eqqarsaatigalugu nunanut allanut samminerunissaq. Kalaallit Nunaatalu namminiilivinnissani tuaviuuppallaassanngilaa, aatsitassanut politikini aaqqissoqqaassuaa. Aatsitassanut politiki allanit, aningaasatigut ikiorsiisunit, aalajangersorneqassanngilaq, taama pisoqaraluarpat Kalaallit Nunaat aningaasarliuleruni aatsitassaatini naalagaaffigiunnaassammagit, Damien Degeorges oqarpoq.
- Aatsitassaqarnermut naalakkersuisup Ove Karl Berthelsen-ip Kinami ministeriunerup tullersortaa naapeqqammerpaa, angullu taanna Kinami pingaaruteqartuuvoq, Damien Degeorges oqarpoq.
Kinallu Kalaallit Nunaannut annertuumik soqutiginninneranut ersersitsilluarpoq Li Keqiang-ip, Kinami pissaaneqarluartut ilaat, kalaallit naalakkersuisuannik ataatsimiiteqateqarmat, ingammik Kalaallit Nunaat naalagaaffiunngimmat.