VIDEO Ilisimatusartoq: INI-p inuunerminni unammilligassaqareersut eqqussavai

Oktobarip aallaqqaataaniit ineqarnermut akiliut ullut 14-ikkaarlugit akilerneqarsinnaajunnaassaaq. Ineqarnermut akiliut qaammammut ataasiaannaq akilerneqartalissaat PBS-ikkullu tamanna ingerlasassalluni. Immikkulli aaqqiissuteqartoqarsinnaassaaq pisariaqartitsisunut.

- Tamanna inuit atugaannik ajornerulersitsisinnaavoq, killormut iliortoqarsinnaagaluarpoq inuit ulluinnarni ilungersuuteqartut akuliutsilluarnerullugit.

Læs også INI-lejere skal bruge betalingsservice i fremtiden

- Inuit eqqugaasussat inuuniarnerminni unammilligassaqareersuusinnaapput. Imaassinnaavormi ullut 14-ikkaarlugit akissarsinatik ikiorsiissutinik pisartagaqartut, Steven Arnfjord Peqqissaanermik Ilisimatusarfimmi ilisimatusartoq KNR-imut oqarpoq.

Innuttaasut amerlasuut ullut 14-ikkaarlugu akissarsisarput, missingersuusiornermilu kontoqanngikkaanni ataqatigiissikkuminaassinnaavoq.

INI-p allafeqarfiinut akiliisarneq inissiaatileqatigiffiup sulisuinut piffissamik sivisuumik atuiffiusarmat, tamanna allanngortinniarlugu aaqqiissut nutaaq ilaatigut atuutilersinneqarpoq. INI-milu attaveqaqatigiinnermut pisortaq, Else Løvstrøm, oqarpoq aaqqiissuteqarneq akiitsulipparpassuit amerlassusaasa apparsarnissaannut ikilisaataasinnaassasoq.