Ilisimatusarneq aningaasaliiffiginerulerpaat
Danskit naalakkersuisuisa aappaagumut aningaasanut inatsisissatut siunnersuutaanni issittumi ilisimatusarneq amerlanerusunik immikkoortitsivigineqarpoq.
Danskit naalakkersuisuisa aappaagumut aningaasanut inatsisissatut siunnersuutaanni 39 million koruunit issittumi ilisimatusarnermut atorneqartussatut immikkoortinneqarput. Ukioq manna aningaasaliussanit 9 million koruuninik amerlanerupput.
Isumaqatigiissut UMTS-imik taaneqartartoq malillugu piginneqatigiiffiit mobiltelefuuninut attaveqaatinik atuinissaminnut akuerineqarsimasut danskit naalagaaffiannut akiliutigisartagaannit 9 million koruunit pissarsiarineqassapput. 6 million koruunit issittumi ilisimatusarnermut immikkoortinneqassapput 3 million koruunillu ilisimatusarnermi atortunik ilisimatusartussanillu assartuinermut kiisalu ilisimatusarfissani pilersitsiortornernut atorneqassallutik. 2007-miit 09-p tungaanut nunat tamalaat issittumi ukiorititaanni issittumi ilisimatusarnermut aningaasat atorneqassapput.
Issittumi ilisimatusarneq 100 millioni koruuninik naleqartussatut danskit issittumi pissutsinik ilisimatusarfiannit ilimagineqarmat aningaasat amigassagatinneqarput.
Danskit issittumi pissutsinik ilisimatusarfiata ataatsimiititaliaani ilaasortaq Henning Thing neriuppoq danskit naalakkersuisuisa nunarsuarmioqatigiit imminnut qanilliartornissaat anguniarlugu aningaasaliissutaannit issittumi ilisimatussartussat taperserneqarumaartut. Nunarsuarmioqatigiit imminnut qanilliartornissaat anguniarlugu 2 milliard koruunik ilisimatusarnernut, ilinniartitsinernut, ineriartitsinernut aallarnisaanernullu immikkoortinneqareerput. Nunatsinniit kissaatit taamaalillutik danskit aningaasanut inatsisissatut siunnersuutaa aqqutigalugu aningaasaliiffigineqarsinnaalereerput.
Danskit aappaagumut aningaasanut inatsisissaanni siornatigut neriorsuutigineqarsimasut maanna aningaaliiffigineqarnissaat anguniarneqartoq IA-p folketingimut ilaasortaatitaata Kuupik Kleistip uppernarsarpaa. Nunatsinni eqqartuussiveqarnerup aaqqissuuteqqinnissaata amerlanerusunik aningaasaliiffigineqarsimannginnera maluginiarsimagini ilanngullugu Kuupik Kleistip eqqaavaa.
Nunatsinni eqqartuussiveqarnerup aaqqissuuteqqinnissaa aningaasassaqartinneqalerpat aatsaat piumaartoq danskit inatsisinut atortitsinermut ministerianit kissaatigineqarsimammat taamatut aaqqiisoqarsimavoq.
Danskit naalakkersuisuisa aningaasanut inatsisissaatut siunnersuutaat sisamanngornermi septembarip arfineq-aappaani siullermeerluni eqqartorneqassaaq.
