ASSIT Ilisimatusarfipiluunersuaq sermersuarmi nuunneqartoq
Ilisimatuutut misissuiffiup NEEM-ip 150 tonsinik oqimaassuseqartup tassungalu atasup illorsuup qitiusutut atorneqartup Nunatta Kitaata Avannaaniit Nunatta Kangiata Avannaanut sermersuakkut 465 km-inik isorartussusilikkut sisoraatinik qamutinillu perlaalerlugu traktorerujussuarnik uniarlugu nikisissimavaat.
Ilisimatuutut misissuiffiup inissisimaffigiligaani nunat tamalaat aappaagumit sermersuarmi qillerilissapput, tamatumanilu Nunatta sermersuata aakkiartornera immallu qaffakkiartornera ilisimatusarfigineqassallutik.
Aamma atuaruk Issittumi ilisimatusarnermi Pinngortitaleriffik siuttuuvoq
Ilisimatusarfik tonserpassuarnik oqimaassusilik taanna, ulluni arfineq pingasuni sermersuakkut angallanneqareerluni marlunngormat ualikkut sisamanut inissisimaffissaanut inissinneqarpoq.
- Misissuiffiup illutarsuata qaarajuttup sermersuakkut uniarlugu nuunnissaannik pilersaarutitta ingasattajaaraluartup iluatsinnera nuannaarutigeqalugulu oqiliallaatigeqaarput, Københavnip Universitetiani Niels Bohr Institutimi Sermimik Silallu Pissusianik misissuiffimmeersoq Jørgen Peder Steffensen oqarpoq.
Misissuiffiup inissisimaffigiligaani NEEM-imik taaguuteqarunnaarluni EGRIP-imik taaguuteqalersumi illutaani pingaarnermi iggaveqarpoq, isersimaartarfeqarluni, sulliveqarluni allaffeqarfeqarlunilu. Taakku saniatigut misissuivimmi qajannaatsunik tupeqarpoq taakkunanilu unnuisoqarsinnaallunilu queqarpoq angallatinullu motoorilinnut inissiiveqaluni. Atortut tamakku qamutit aqqanillit atorlugit nuunneqarput.
Aamma atuaruk A.P. Møller Fonden sermersuarmi qilleraluni ilisimatusarnissamut 25 mio. kr.-inik aningaasaliisoq
Assartorneqartut nalunaaquttap akunneranut 7 imaluunniit 9 kilometerinik nikisinneqarsinnaasarput, angallannerallu ullunik arfineq pingasunik sivisussuseqarluni.
Ilisimatuutut misissuivimmi inuit 25-t imaluunniit 30-t aappaagumiit sulisinnaassapput, misissuiviullu sivikinnerpaamik 2020-p tungaanut atorsinnaanissaa naatsorsuutigineqarluni.
