Issittumi ilisimatusarnermi Pinngortitaleriffik siuttuuvoq

Pinngortitaleriffiup Issittumi ilisimatusarnermini ilisimatuutut misissuinini tulluussimaarutigisinnaavaa. Ilisimatusartut akornanni ilisimatusaatigineqartut nammineq ingerlatat tusagassiuutini atuagassianilu issuaaffigineqartarnerat pingaarutilerujussuuvoq. Misissuinermi nutaami saqqummiunneqaqqammersumi paasinarsivoq, Pinngortitaleriffik kunngeqarfimmi Danmarkimi ukiuni 2008-mit 2011-mut issittumi ilisimatusarneq pillugu ilisimatuutut allaatigisat pineqartillugit issuarneqarnerpaanut pingajuusoq.
Allattoq Elisa Isaksen
juulip 06-at 2014 15:27

Pinngortitaleriffiup Naalagaaffeqatigiinni ilisimatusarnermi saqqummersitsisarnera taamaallaat Niels Bohr Instituttemit aamma Danmarks Meteorologiske Institutimit, DMI-mit qaangerneqarpoq.

Nalunaarusiami nutaami Danmarkimi issittumi ilisimatusarnermik ersersitsisumi tamanna paasinarsivoq. Suliffeqarfiit ilisimatusarnermik ingerlatallit misissuiffigineqartut 91-iusut Nunatsinnersuupput, Savalimmiuneersuullutik Danmarkimeersuullutillu.

Immami aalisarnermilu Issittumi uumassusilerineq pineqartillugit, Pinngortitaleriffik tunniussaqartuni siuttuuvoq, Aarhus Universitetimit tulliuffigineqarluni.

Ataatsimut isigalugu Issittumi ilisimatusarneq pineqartillugu nunarsuaq tamakkerlugu ilisimatusarfiusuni Danmark normu 8-tut inissisimavoq. Maannami tamanna ilisimatusarfigissallugu nunani tamalaani soqutigineqartorujussuuvoq.

Nunani tamalaani silap pissusiata allanngoriartornerata tamatumalu Issittumut kingunerinik issittumut tunngasunik ilisimatusarnissaq soqutigineqarnerulersikkaa, Pinngortitaleriffimmit tusagassiuutinut nalunaarummi oqaatigineqarpoq.   

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq