Ilisimatusarfimmi ullumikkut ulloq nalliuttorsiualaarfiussaaq.
Tassami soraarummeertoqassaaq – naggataarnersiorluni nalliuttorsiualaartoqassalluni, naammassisussallu 13-iupput. Allaffissornermut, kulturimut- aamma inuiaqatigiilerinermut, teologimut, oqaatsinut, atuagaateqarnermut tusagassiuteqarnermullu bachelorinngortoqassalluni.
Soraarummeertut nuannaassagunaqisut soraarummeersimanermut uppernarsaatinik tunineqassapput, oqalugiartoqassaaq tumannguersaatissanillu aamma peqassalluni.
Bachelorinngortut ilaasa aqqa immaqa maluginiarneqarnerpaasinnaavoq:
Peter Grønvold Samuelsen allaffissornermut ilinniarnerminut naammassilluaqisaminut bachelorinngornermini uppernarsaammik tunineqassaaq.
Peter Grønvold Samuelsen Royal Greenlandimi siulersuisuni siulittaasutut qinerneqaqqammerpoq, taamaammat allagartartaani atorfissaqartissagunaqaa.