Ilisimatusarfimmi siulersuisut kalaallisut oqalussinnaatitaalerput
- Tassa siullermilli immitsinnut atassuteqarfigileratta soorunameertutut qallunaat oqaasii atorneqarmata assut uanga qisuariarfigigakku, tassa nunatsinni aqutsisussaallutalu nunatsinni oqaatsit atorneqarluartut atornagit taamatut nalunaarsuisarmata, sulinitsinni taamallu annertulaartigisumi oqaatsitta inissinneqarnissaat eqqartulaallaqullugu. Eqqartorparput, ilutsinnili imatut siunertaqanngitsoq kalaallit oqaasiinnaat atussallutigit, kisiannili pingaartikkakku una nunatsinni inuiaat 80-90 procentii sinnerlugit kalaallisut oqalulluarsinnaasut taakkua aqutsinitsinni atorneqassammata. Aammalu utimut nalunaarsuutinik tunioqqaassagutta soorunami kalaallit oqaasii atorneqartariaqarsorigakkit , aamma Ilisimatusarfimmut qanilaarnerunissaq anguniarlugu, taanna kikkulluunniit pigilertussaammassuk – Ilisimatusarfik Ilimmarfllu. Nammineq suminngaanneeraluaruttaluunniit oqaatsivut atorlugit aqutseqataasinnaalerpugut, assut iluarpoq. Inuiaavugummi aamma immikkuullarissumik oqaaseqarlutalu inuuseqartugut, taamaattumik taakkua akornutiginagit kisianni tunniussatut nukittussutigalugit taanna anguniassagatsigu. Nuannersumik kiffaanngissusermik taanna malugititsisoq uanga malugaara, tassa oqaatsit suulluunniit atorlugit tunniussaqarsinnaaneq taanna pingaarmat.
Ilisimatusarfimmi siulersuisut suleriaasissaannik taamatut aalajangiussinerup kinguneranik siunissami ataatsimiinnerit nalaanni nutserisoqartalissaaq. Aallarniutaasumik siulersuisut ataatsimiinnerminni ilaasortat tamarmik Danmarkimi Namminersornerullutik Oqartussat allaffianni pisortaq, Tove Søvndahl Pedersen siulittaasussamittut toqqarpaat. Ilisimatusarfimmi pisortatut atorfik maanna inuttassarsiorneqalerpoq.
