Ilisimatusarfimmi lektori: Tamat oqartussaaqataanerannik unioqqutitsineruvoq

Inatsit atuuttussanngortinneqartoq naalakkersuisunillu atorneqartoq imminnut iluaqutigisassatut atuutsinneqalersimanerarlugu Pia Vedel Ankersen oqarpoq.

- Naalakkersuisut namminneq iluaqutissaminnik inatsisiliorsimagaluarput, taamaaliorlutillu inatsisit atuuttut unioqqutinneqarsimanatik. Aap, inatsisinik unioqqutitsisoqarsimanngilaq, inatsisilli malinneqarsimasut imminut iluaqutissatut sananeqarsimagaluarmata tamat oqartussaaqataanerannik unioqqutitsinerusimassaaq, Ilisimatusarfimmi lektori Pia Vedel Ankersen oqarpoq.

Taama naliliineq Demokraatit siulittaasuannit Jens B. Frederiksenimit isumaqatigineqarpoq:

- Uagut politikeritut pissuserissaartussaavugut, maligassiuisussaallutalu. Taamaammat imminut iluaqutissanik inatsisiliorneq pissusissamisuunngilaq. Soorunami illut taamaattut siunissami pisariaqartinneqartussaapput. Nunatta Nmminersulernissaa akuersissutigeqqammerparput, susaqarfinnillu nutaanik tigusissagutta illut taakku pisariaqartinneqassapput, pisortanik nutaanik atorfinitsitsisariaqassagatta, Jens B. Frederiksen oqarpoq.

Rigsrevisionitut, tassa Naalagaaffiup pigisaanik nalilinnik nakkutiginnittutut taaneqarsinnaasunik pilersitsisoqarnissaa Pia Vedel Ankersenip kajumissaarutigaa. Inatsisit imminut iluaqutissatut atorniarneqarsimassappata taamaaliornikkut kinguneqartinneqarsinnaanissaat qulakkeerneqarsinnaassasoq lektorip oqaatigaa. Inatsisit massakkutut itsillugit qinikkat atorfillillu malersorneqarsinnaanngillat.