Ilisimatusarfimmi ilinniartoq: Kalaalinngorsaaneq unitsinneqarli

Ilisimatusarfik pillugu inatsisissatut siunnersuut Inatsisartuni marlunngorpat oqaluuserineqassaaq. Ilisimatusarfimmi rektorinngorsinnaanissamut tunngatillugu piumasaqaatit ilaatigut annikillisaaviginiarneqarput, tamanna Ilisimatusarfimmi ilinniartut iluarinngeqaat. Taamaattumik ataasinngorpat akerliussutsiminnik takutitsiniarput.

Ilinniartut ilaat Helga Rosing Nathanielsen aperaarput periarfissiinertut isigineqarsinnaannginnersoq piumasaqaatit annikillisarneqarmata. Imatullu akivoq:

- Periarfissaavoq annertooq, kisianni allamiut unammillerusuppakka. Pissutigalugu kalaaliugama sapernangalu, Helga Rosing Nathanielsen oqarpoq, nangipporlu:

- Naalakkersuisut siunnersuutaat nakkarsaaqaaq. Allassimasut naapertorlugit kandidatitut naammassinnissimasoq naammagiinnarpaat, kisianni assoruukkusuppugut. Allamiut angerusuppagut, ilisimatusarneq annertusarneqarli, kalaalinngorsaanerlu unitsilli, palasinngorniarluni Ilisimatusarfimmi ilinniartoq Helga Rosing Nathanielsen oqarpoq.

Taassuma aamma neriuutigaa Inerisaavimmiut akerliussutsimut peqataallutik isummatik annikkumaaraat.