Ilisimatusarfimmi ilinniartitsisoqatigiit uparuaapput

Inatsisartut Ilisimatusarfik pillugu ingerlatsinermut inatsimmik allanngortitsinerat piviusunngortussanngortoq Ilisimatusarfimmi ilinniartitsisoqatigiit sakkkortuumik uparuarpaat. Inatsisartut ippassaq aappassaaniigaata kingunerissavaa, pisortanngortussanut piumasaqaatinik annikillisaaneq, Pro-rektor Birgit Kleist oqarpoq.

- Annilaangatigineqarsinnaavoq ilinniartitsisoqatigiinnuinnaanngitsoq aammali ilinniartunut sunniuteqarnerlunnissaa, Birgit Kleist oqarpoq.

Ilinniartut ilungersorlutik nunarsuarmi universitetini ilinniakkanut nallersuussiinnaasumik angusaqarusuttarput.

- Ilinniagaalli ulluinnarni Ilisimatuarfimmik ingerlatsisuusussanut immaqa ilisimatusarnermik misilittagaqanngitsuusussap apeqqusernartilersinnaavaa. Allaallu immaqa ilinniagartik universitetini allani nangissinnaassanagu, Birgit Kleist nassuiaavoq.

Aperaarput rektoritut, prorektoritut, institutlederitullu atorfimmik siunissami qinnuteqartup ilisimatusarsimanissaanik piumasaqaateqartannginnissaq sooq taama ajoritigineraa. Ilisimatusarsimanngikkaluartorluunniit pisortaalluarsinnaannginnami?

- Taamaalluarsinnaavoq, kisianni ullumikkut pissutsit atuuttut takutereerpaat qanoq pingaartigisoq ilisimatusarnermik misilittagaqareernissaq, pingaartumik nunani allani universitetit suleqatigissagaanni, ilinniarnerullu ingerlarnanik piareersaassagaanni.

Birgit Kleist aamma isumaqarpoq piumasaqaatinik annikillisaanerup kingunereratarsinnaagaa Ilisimatusarfiup avataanit isigineqarnerata ajorseriarneranik.

- Apeqqutaalissaaq ilisimatusarfivittut siunissami taaguginnarsinnaassanersugut. Maanna ilinniartitsisoqatigiinni assut toqqissisimanngilagut. Inatsisartut aalajangiinerat upperiuminaatseqaarput. Sulisut tamaasa sinnerlugit taama oqarsinnaalluarpunga, Birgit Kleist naggasiivoq.

Inatsisartuni kultureqarnermut Ilinniartitaanermullu ataatsimiititaliami siulittaasoq Kristian Jeremiassen oqarpoq, partiit amerlanerussuteqartut, Inuit Ataqatigiit, Siumut Atassullu, inatsisissaq ippassaq akuerigaat.

- Piumasaqaatinik minnerpaaffiliiginnarpugut, sulisut annilaangassutissaqanngillat, siunissami pisortatut atorfinittarumaartussat nalilersorneqarluartassapput, Kristian Jeremiassen nassuiaavoq.