Ilisimatusarfimmi ilinnialersut 172-it tikilluaqquneqarput
Ilinniartunngortullu ilinniarnertik naammassigunikku Nunatta avataanit sulisussarsiortarnermik immaqa minnerulersitsisinnaassapput.
Ilisimatusarfimmi ilinniakkatut sammiviit assigiinngitsut quliupput, nutaanersaallu tassaalluni inuussutissarsiornikkut aningaasarsiornermi bachelorinngorniarneq. Tassani ilinniartunngorlaat 19-iupput.
AAMMA ATUARUK Kinaluunniit ilinniagaqarsinnaavoq
Inuussutissarsiornermi aningaasarsiornermi ilinniartut ilinniagartik naammassigunikku namminersortut pisortalluunniit suliffeqarfiutaanni aningaasarsiornermik immikkut ilisimasalittut sulilersinnaapput imaluunniit suliffeqarfiup ingerlanneqarnerani ineriartornissaanullu tamatigoortumik ilisimasalittut ilinniarsimasuusinnaallutik.
Ilinniartitsisunngorniat amerlanerpaallutik katillutik 57-iupput. Taakkunannga aqqaneq-marluk najugaq qimannagu ilinniartitsisunngorniarlutik aallartipput.
Aamma atuaruk ASSIT Ilisimatusarfimmi ilinniartut nutaat 180-it aallartipput
Ilinniakkani sammivinni assigiinngitsuni ikinnerpaanik ilinniartoqalersut tassaapput tusagassiortunngorniat aamma upperisarsiornermik ilinnialersut tamarmik arfiniliusut.
- Ilinniakkanik aallartitsisut inuiaqatigiinni atorfissaqartinneqartorujussuupput, pisortaq Tina Pars tikilluaqqusilluni oqalugiarnermini ilaatigut taama oqarpoq.