Ilisimatusarfik pillugu inatsisissatut siunnersuut akuersissutigineqarpoq

Inatsisartut ataatsimiittarfiani tusarnaariat nakangallutik oqimaattumik allortarlutik aniartorpalunnerat inatsisiliortunit maluginiarneqarput.

Tassa Ilisimatusarfik pillugu Inatsisartut inatsisissaannut siunnersuut pingajussaaneerneqarluni akuerineqarmat kinguninngua pisut,

Inatsisissaq Inuit ataqatigiinnit, Siumumit, Atassutikkormiunillu 23-inik inuttaqarlutik akuerinearpoq, arfineq marluk akerliusut. Inatsisissamut ataaseq qinerseqataanngilaq.

Lene Knüppel, Demokraatineersoq, inatsisissamut politikkikkut aaliangiisut ataqqineraraluarpai, oqarlunili Ilisimatusarfiup inatsisitigut nalikillineqarnera ilinniartunik eqquissasoq.

Akerlianillu Inuit ataqatigiit sinnerlugit Johan Lund Olsen inatsisissaq illersorpaa, ilinniartunit ernummatit eqqunnginnerarlugit tunngavissaqarsorinangillu, inatsisissaq ilisimatusarnermik qaffasinnerpaamik tunngavilersuimmat.

Ilisimatusarfik pillugu inatsisartut inatsisissaannut siunnersuut Ilisimatusarfimmi ilinniartunit arlalitsigut isornartorsiorneqartarpoq, inatsisissamilu tunngavilersuutigineqartartut assigiinngitsunik isummerfigineqaqattaarluni. Inatsit inatsisiliortunit akuerineqartoq, oqallisigineqarnera maanga killilerunanngilaq. Ilisimatusarfimmiut inatsisartut ataatsimiittarfiani tusarnaareerlutik maanna Ilisimatusarfimmukarput, inatsisitut akuerineqartoq eqqartussallugu.