Ilisimatusaatigalugu ukiuni pingasuni allaaserinnissaaq
Suliariniagaata taaguutigaa "Nunatsinni marloqiusamik inooqataalersitsisarneq, inuit akornanni misigissutsikkut inooqataanerullu misigitinneqarnerata kingunerisaanik inuttut iluarusunneq". Karen Marie Nathansenip ilisimatusarnermini siunnersortigissavaa, ilisimatooq Lars Dencik, inuit akornanni tarnikkut pissutsit pillugit arlaqaqisunik atuakkiaqartoq.
- Pissutsit piviusut aallaavigalugit allaaserisaqarumaarlunga neriuutigaara, taamaalillunga siunissami sulininni atorsinnaaniassagakku, Karen Marie Nathansen oqarpoq.
Ilisimatusarnerup ingerlanerani piviusut aallaavigalugit misissuinissaq pisariaqarpoq, taamaattumik Nunatsinni ulluinnarni angerlarsimaffinni, meeqqerivinni atuarfinnilu meeqqanik perorsaaneq, Nunatsinni kulturi tarnikkullu pissutsit aallaavigalugit misissuisoqassaaq.
