Issittumut Ukioritasooq aappaagu marsip aallaqqaataaniit aallartippat nunarput ilisimatuunit nunanit allaneersunit issittoq pillugu ilisimatusarniartunik tusindtilikkaanik ukiuni aggersuni tikerarneqalissaqqooqaaq,
Issittumut Ukiorititaasoq upernaaru marsip aallaqqaataaniit aallartikkuni ukioq 2009-mi upernaap tungaanut sivisussuseqassaaq, taamanikkussamullu inuit suleqataasussat nunanit 60-ineersut katillutik 50.000-it missaanniissapput.
Issittumut ukioritami ilisimatusaatigalugu suliassat annertuut 123-iupput, taakkunanngalu 13-it aningaasaliiffigineqarluarsimapput, allallu 52-it tamakkiisumiunngitsoq aningaasaliiffigineqarsimallutik, ukiortaallu kingorna aallarteriissasut ilisimatusarnissanik ataqatigiissaaritsoq Dansk PolarCenterimeersoq Henning Thing ilisimatitsivoq.
Nunatsinni danmarkimi savalimmiunilu ilisimatuut 300-it missaanniittut suliaqassapput, ilisimatusarfiillu 82-it peqataassallutik, taakkunannga 24-it qitiusumik ingerlatsiviussallutik.
- Silaannaap allanngoriartorneranut issittoq malussarissorujussuuvoq, nunarsuarmilu uumasoqassutsimut silallu pissusiinut sunniutilerujussuulluni, Henning Thing oqarpoq.