Ilisimatooq: Pissarissaarnerit inigisamut akiliuteqarnerulersinnaapput
-Suliniutit annertuut Kalaallit Nunaanni aallartisarneqarneranni, soorlu Alcoap suliffissualiorniarnera eqqarsaatigalugu, allanut aningaasartuutissat apparsarneqartariaqarput. Maniitsummi eqqaani illoqarfeeqqap sananeqarnissaa akissaqartinneqartariaqarpoq. Pisortatigut aningaasartuutit sutigut ilanngartorneqarsinnaanersut misissorneqartariaqarpoq, soorunami aamma akileraarutit qaffanneqarsinnaapput. Siunnersuisoqatigiinniilli aningaasarsiakkaanerit pisortat iniutaannik attartortut ineqarnerminnut annerusumik akiliisalersinnaanerat, peqatigiillunilu inissialiortarnermut, namminnerlu illuliorniartunut tapiissutaasartut appartinneqarsinnaanerat qimerloorsimavarput. Uagut siunnersuisoqatigiiginnaavugut, Naalakkersuisut namminneq akileraarutinik qaffaarusunnerlutik assigiinngitsutigulluunniit sipaarniarusunnerlutik aalajangiiffigissavaat. Qanorluunniit iliuuseqassagaluarpata, innuttat paasissutissinneqarnissaat pingaartupilussuuvoq, inuimmi paasisariaqarpaat sooq politikerit sukkut sipaaruteqarniarnersut imaluunniit qaffaaniarnaersut, ilisimatooq Chresten Sørensen oqarpoq.