Ilisimatooq: Nobelimik nersornaaserneqartut avataarsuanut ilisimasanut aallarniisuusut

Schweizimiut ilisimatuut, Michel Mayor aamma Didier Queloz seqinitta kaavitaatalu avataanni ullorissamik angalasumik siulliullutik ukiut 24-t missaasa matuma siorna nassaarput, taakkulu nobelimik ullumi nersornaaserneqarput.

Ilisimatuut taakku marluk silarsuatsinni kisimiinnginnitsinnut paasissutissat siulliullutik nassaaraat. Taamaalilluni ilisimatuut ullumikkut angusimasaannut aallarniisuullutik.

Taamaammat nobelimik nersornaaserneqarnerat tulluartoq, Aarhusimi Universitetimi Institut For Geosceiencemi lektori, Christoffer Karoff naliliivoq.

- Silarsuatsinni allamik inuuneqarneranik paasiniaanissamut pissutissanik nassaarput. Nassaarissanerippulli taanna alloriarnerup tulleraa, Christoffer Karoff oqarpoq.

Schweizimiut taakku marluullutik kisimik ukioq manna nobilimik nersornaaserneqanngillat. Tassa ilisimatooq canadamiu amerikamiunit kingoqqisoq, James Peebles schweizimiut ilagalugit aamma nersornaaserneqarpoq.

Taassuma silarsuatsinnut tunngatillugu ullumikkut paasinnittarnitsinnut pingaaruteqartut ilimagisani tunngavigalugit sinaakkusersorsimavai.

- James silarsuatta ukiorpassuit matuma siorna pileqqaarneranit qanoq ineriartorneranut paasinninnissatsinnut tunngavinnik ineriartortitsisuni qitiusut ilaanniissimavoq, ulloriarsiornermut ilisimatooq, DTU Spacemilu siunnersortaaneq, Michael Linden-Vørnle oqarpoq.