Ilisimatooq Minik Rosing nersornaatisisoq
Minik Rosing Isukasiata eqqaani ujaqqanik nunarsuatsinni pisoqaanerpaanut ilaasunik assissaqanngitsumik misissuinini pissutigalugu 25.000 koruuninik nersornaatisivoq. Misissuinerit taakkua Nunarsuup pinngoriartoqqaalernerani taamaassorinninnernik malitseqarsimapput.
Nersornaat GEUS-imi pisortap tullianit Flemming Getreuerimit tunniunneqarpoq, nersornaasiinerlu ima tunngavilersorpaa:
- Minik Rosingip Kalaallit Nunaannik ilisimasaqarluarnini atorlugu, tamanna nunat tamalaat ilisimatusarnerannut akuulersippaa, taamalu nunat tamalaat akornanni ilisimatusarnermik suleqatigiissitsilerluni, soqutigineqarluinnartumillu saqqummiussilluni. Kalaallit Nunaanni ujarassiornermut ujarassiornermullu nalinginnaasumut aallartitaalluartuuvoq.
Minik Rosingip 2004-mi pisoqaassutsimik misissueriaaseq kulstof 14 atorlugu ujaqqat Isukasiata eqqaaniittut misissornerisigut paasivaa, nunarsuatsinni fotosyntese ukiut 3,7 milliardit matuma siornagut aallartissimasoq, aamma maanna oqaatigineqartartumit siusinnerusukkut inuunermik pilersoqarsimasoq. Taamatullu sulinera nunanit tamalaanit soqutigineqaqaaq.
