Ilisimatooq: Iluliarsuit nunatsinni uuliasiorneq akornusersinnaavaat
Jan-Gunnar Winter Norge-mi issittumi ilisimatusarfimmi Det Norske Polarinstitut-imi pisortaasoq, mianersoqqussutteqarpoq sermersuup sukkasuumik aakkiartornera qulakkeerlugu paasineqarmat.
- Umiarsuarmik imaluunniit angallamik ingerlaartillutit ilulissallu siuninniittut amerlassusaat allannguuteqarpat, taava taakkua apornissaannut aarlerisaaruteqarneq nutaanngilereersimassaq, Jan-Gunnar Winter nutaarsiassaqartitsivimmi Bloomberg-imi taamatut issuarneqarpoq.
Taassuma erseqqissarpaa uuliasiortitseqatigiiffiit ilulissat ingerlaarfiinik malinnaanissaat naatsorsuutigigini, taamaaliunngikkunimmi iluliarsuarnut aporsinnaagamik.
Iluliarujussuit ingerlaarfigisartagaasa allanngorarnerat ajornartorsiutaavoq. Kalaallit Nunaata kitaanit kujammut ingerlaarnerminni Qeqertaaluup kangerliumarnga Davis Stræde-lu ingerlaarfigisarpaat, aqqutigisartagaannilu uuliasiortitsiviit arlaqartut uuliamik ujaasinissamut akuerineqarsimapput.
Skotland-imiut uuliasiortitsiviat Cairn Energy uuliasiornermi nalaani umiarsuarnik arfinilinnik piareersimatitaqarpoq taakkua ilulissanik uuliasiortitsiviup tungaanut ingerlaartunik illuartitsisinnaallutik.
Suliffeqarfik Kalaallit Nunaanni aatsitassarsiornissamut soqutiginnittut ilagaat A.P. Møller Mærsk. Suliffeqarfissuup taassuma Danmark-imi silasiorfik Danmarks Meteorologisk Insititut suleqatigaa iluliarsuit taakkualu ingerlaarfiisa nakkutigineqarnerat pillugu.
- Avatangiisit allannguuteqartuaannarsinnaapput. Sikusarnera ilulissallu ingerlaarfigisartagaat allannguuteqartuaannarsinnaallutik, Toby Croucher Mærsk-imi avatangiisinut immikkoortortaqarfimmi pisortaq oqarpoq.