Ilisimatooq: Borgen pitsaanerusinnaagaluarpoq
Kalaallit Nunaat pillugu Kirsten Thisted ilisimatuujuvoq, taassumalu takusani Borgenimi nuannarinngilaa.
-Isiginnaagassiaq pakatsissutigisorujussuuara. Isiginnaaginnarlugu nuanniilliulerpunga, uumisulerlunga pakatseqalungalu, Kirsten Thisted oqarpoq.
Kirsten Thisted Københavnip Universitetiani lektoriuvoq. Isiginnaagassiaq pakatsissutigaa:
- Imminortoqartarpoq, atuarfiit ingerlalluanngillat, politikerit peqquserlullutik sulisarput. Taamalu oqariartornera, DR-ip piviusulersaarutaanut "Flugten fra Grønland"-imut assingutippara. Oqaatiginiarneqarpoq kalaallit tulluusimaarutissaqanngitsut. Isiginnaagassiamili danskimik politikerimik takkuttoqarpoq, kalaallillu tulluusimaarutissaannik tunillugit.
Kirsten Thistedip siullermik tusaramiuk, isiginnaagassiaq Kalaallit Nunaat pillugu imaqassasoq, nuannaarsimagaluarpoq. Ilimagisimagaluaramiummi isiginnaagassiami, Danmarkip nunasiaateqartutut aqutsisarnera oqallissaarutigineqalissasoq.
- Isiginnaagassiami oqaluttuarineqarpoq, Kalaallit Nunaat namminersulersoq danskip politikerip taamatut uummammioqarnerata kingorna. Takutinneqarpoq kalaallit namminneerlutik aalajangiisinnaasimanngitsut, taamaallaalli kalaallit sapililersutut takutinneqarlutik.
Kirsten Thisted isumaqarpoq, Angunnguaq Larsen inuttaaffimminut tulluanngitsuusoq, naalakkersuisut siulittaasuattut inuttaanera inuusuppallaartoq oqaatigalugu.
- Taanna inuusuttoq piviusumik politikerinut misilittagalinnut sinniisuusinnaanngilaq. Politikeritoqqat inuunertik atornikuuaat namminersulernissamut isumaqatigiissut naammassiniarlugu. Angunnguaq Larsen isiginnaartitsilluartorujussuuvoq, isiginnaagassiamili inuttassarsiuussisut kukkusunik kalaallinik inuttalersuisimasut oqarusuppunga.
Kirsten Thisted filmiliortuusimasuuguni allaanerusumik iliorsimassagaluarpoq:
- Kalaallit Nunaat uagut nalitsitulli takutissimassagaluarpara. Namminersulernermik suliaasimasut annertuut takutissimassagaluarlugit.
Ippassarlu Borgenimi takusani ima nalilerpaa:
- Angusinngilaq, Kalaallit Nunaat pitsaanerusumik oqaluttuarineqarsinnaagaluarpoq. Isiginnaagassiaq ataasiarlugu takoreerlugu, Kirsten Thistedip taama qisuariaateqarluni naqissuserpaa.