Ilisimatooq: Aatsitassarsiornisaq uatsilaaq

Ineriartortitsineq eqqartorneqaleraangat piffissaqarluarnissaq eqqarsaatigisariaqarpoq. Antropologi Florian Stammler Laplands Universitet-iminngaanneersoq taama siunnersuivoq. Taanna Issittup ukiorititaanut atatillugu Nuummi ullumi ataatsimeersuaqataavoq. Nunatsinni siunissami aatsitassarsiornissamik pilersaaruterpassuaqarpoq. - Aalajangigassat aalajangerneqareeraangata avatangiisit ajorsereersut iluarseqqinneqarsinnaanngimmata eqqaamaneqassaaq, Florian Stammler eqqaasitsivoq.
Allattoq Jens Thorin
aggustip 22-at 2008 16:23

Florian Stammler Lapland-ip Universitetiani Finlandimiittumi issittunut tunngasunik ilisimatuujuvoq. Taanna Ruslandip avannaani Sibiriamilu suliffissuaqalernerata inooriaatsimut kulturimullu sunniutaanik misissuinikuuvoq.

- Issittumi suliffissuaqarnikkut ineriartorneq assigiinngitsorujussuarmik kinguneqartarpoq. Inuit isertitaqarnerulertarput. Ajornartorsiutaavorli, aningaasat nunaqavissunut tunneq ajormata, Florian Stammler nassuiaavoq.

Innuttaasut pisuussutinik piaanerup kinguneranik atugarlioreersarput. Assersuutigalugu tuttut nerisartagaat orsuaasat mingutsinneqarpata tuttut nerisassaarutissapput.

- Inuiaqatigiit issittumiittut namminneq nunaminni ikinnerussuteqalerput. Inuit suliffissuarni sulisut annerusunik aningaasarsiaqarnerusarput, nunaqavissut aningaasatigut isertitakinnerusarlutik, Florian Stammler oqarpoq.

Taamaattumik antropologi Kalaallit Nunaanni ineriartortitsinerup unikaallatsinnissaanik

eqqarsarluartoqarnissaanillu siunnersuivoq.

- Suliffissuaqarnikkut ineriartorneq piffissaqarfigilluartariaqarpoq. Aalajangiisoqareerpammi, avatangiisit aserorsimasut iluarseqqinnissaat pisariitsuunngilaq, oqarpoq.

- Pingaaruteqartorujussuuvoq iliuuseqalinnginnermi kingunissaasa suulluunniit eqqartorneqarnissaat, Florian Stammler Finland-imi Lapland-ip Universititianeersoq naggasiivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq