Ilisimasassarsiorluni angalasimaneq malunnartinniarneqassaaq

Qallunaat katersugaasivii pingasut Nunatta Katersugaasivia suleqatigalugu Ilisimasassarsiorluni Angalanerup ukiunik hundredenngortorsiornera malunnartinniarlugu angalanissaq pilersaarusiorpaat. Angalanissamilu ilisimatuut takornarianik ilaserinnipput.

Eqqaaniaalluni angalanermi ilaatigut Kangerluk 79 tikinneqassooq, Jørgen Brønlundillu Ilisimatusarluni angalanermi peqataasimasup ilerra alakkarneqassalluni.

Eqqaaniaalluni angalanissami peqataajumallutik nalunaarsimasut amerlapput, angalanissami aqutsisoq Ove Sørensen taama oqarpoq.

Maannakkumut peqataajumallutik nalunaarsimasut 60-iupput. Umiarsuarmili ilaasunut 45-innarnut inissaqarmat peqataajumallutik nalunaarsimasut 15-t sinnerussaallutik ilaasinnaanngillat.

Ilimagisimavara ilaanissamut soqutiginnittoqarnissaa kisiannili tupaallaatigeqaara angalanissatta nalunaarutigineqarneraniit piffissaq sivikitsuinnaq ingerlareersoq inuit taama amerlatigisut soqutiginnillutik nalunaarsimammata. Tusagassiutitigummi pilerisaarinatalu takoqqusaarsimannginnatta.

Peqataasussallu allattorsimaffianni takusinnaavara peqataasussat tassaasut utoqqaanerusut akissaqarluartut taakkualu angalanissami akigititaq aporfigisimanngilaat.

Kalaallit Nunaanni angallannikkut pissutsit nioqqutissallu Tunumi akii eqqarsaatigalugit angalanissamut peqataanissamut akigititaq akisugisassaanngilaq.

Eqqaaniaalluni angalanissaq augustip naalernerani 2007-mi pisussatut pilersaarutigineqarpoq. Angalaqataasussallu akiliutigissassaat 30.000 koruuniniit - 50.000 koruunnillu akornaniissaapput