Danskit kulturianni, innuttaasunut tunngasuni oqaluttuarisaanerannilu misiligummi nutaami nunami allamiut danskisut innuttaassuseqalerniarlutik qinnuteqaraangamik Danmarki pillugu ilisimasaat misilinneqartalissapput.
Danskisut innuttaassuseqarniarlutik qinnuteqartut siulliit misilitsikkunik apeqqutinit 40-nit 28-t eqqortumik akissavaat, apeqqutillu siulliit tallimat ullumikkorpiaq pisunik imaqassallutik. Sinneri apeqqutit 200-t nunanit allaninngaanniit Danmarkimut nunasisut pillugit ministereqarfiup ullumikkut saqqummiussaasa akornanni toqqarneqassapput.
Danskisullu innuttaassuseqalerniarlutik qinnuteqartut aammattaaq Kalaallit Nunaat pillugu ilisimasaqalaassapput, akuerineqarniassagunik.
Ataatsimooqatigiit tassaasut Danmarki, Kalaallit Nunaat Savalimmiullu qanoq taaneqartarpat? – apeqqutit ilaat taamatut oqaasertaqarpoq.
Taanna taaguuteqarpa:
A: Nunat ataatsimooqatigiit B: Naalagaaffeqatigiit ataatsimoortut C: Naalagaaffeqatigiinneq.
Apeqqutip aappaa:
Kalaallit Nunaat Savalimmiullu namminersorneruffiupput. Suliassaqarfiit pingaarutillit ukua Namminersornerullutik Oqartussat ataanniinngillat?’
A: Ilinniartitaaneq
B: Peqqinnissaqarfik
C: Nunat allanut sillimaniarnermullu tunngasumik suliassaqarfik (X)
Kiisalu makkua ilisimasariaqarlugit: Kalaallit Nunaanni Savalimmiunilu Folketingimut ilaasortat qassit qinerneqartarpat?
A: Kalaallit Nunaanni Savalimmiunilu Folketingimut ilaasortaqanngilaq.
B: Kalaallit Nunaanni Savalimmiunilu Folketingimut ilaasortat katillugit sisamat qinerneqartarput (X)
C: Kalaallit Nunaanni Savalimmiunilu Folketingimut ilaasortat katillugit arfineq-pingasut qinerneqartarput.
Misilitsinneq danskisut innuttaassuseqalerniarluni qinnuteqaatip pissarsiarinissaanut malittarisassanik sukannernerulersitsineruvoq, danskit naalakkersuisuisa aamma Dansk Folkepartip 2005-imi akuersissutigisaat.
Akissutit eqqortut sorliunersut nittartakkatsinni ungasinngitsukkut takusinnaalissavasi.