Ilisimasallit sakkortuumik mianersoqqusipput
Naalagaaffiit Peqatigiinni silaannaap pissusaanik ilisimasallit ullaap tungaani manna tikillugu sakkortunerpaamik mianersoqqusipput oqarlutik, nunarsuup kiatsikkaluttuinnarneranut uagut inuit pisuusugut.
Tamanna silaannaap pissusaanik ilisimatusartut qangalili ilimagisimavaat, ersarissumilli naqissuserneqarsimanngilaq.
Naalagaaffit Peqatigiinni silaannaap pissusaanik ilisimasallit ullaap tungaa nalunaarusiarsuarmik ilaat saqqummiuppaat.
- Nalunaarusiap immikkoortuani siullermi silaannaap allanngoriartorneranut inuup sunniutai sammineqarput. Inuit iliuusaasa silaannaap allanngoriartorneranut sunniuteqarnerat qulakkeeraluttuinnarparput, Susan Sullermann, Naalagaaffiit Peqatigiinni silaannaap pissusaanik ilisimatusartut nuimanerit ilaat oqarpoq.
Ilisimatusartut oqaatigaat maanna 90 procentimik uppernarsisimagitsik silaannaap allanngoriartorneranut aamarsuarnik, uuliamik, benziinamik gassimillu ikumatitsiuarnerput pisooqataasoq. Ukiuni kingullerni 50-ini uuttuisarnerit tamanna ersersippaat.
- Gassit silaannarmik kissakkiartortitsisut annertusiartornerannut inuit pisuunerat qulakkeerlugu paasisaqarfigigaluttuinnarparput. Susan Sullermann oqarpoq.
Nalunaarusiamissaaq aamma oqaatigineqarpoq gassit silaannarmik kissakkiartortitsisut pisuullutik silap allanngorarnerujussui pisartut. Matumani pineqarlutik anorersuit kaavittuliortut sakkortusigaluttuinnartut, panernersuaqartarnera qarsutsinersuillu. Tamakkualu sakkukilliartornavianngitsut silaannaap pissusaanik ilisimasallit oqaatigaat.
Naalagaaffiit Peqatigiinni silaannaap pissusaanik ilisimasallit oqaatigaat silaannaap kiatsikkaluttuinnarnissaa iliuuseqarfigineqarsinnaasoq.
- Februaarip aappaat eqqaamaneqarniarli silaannaap pissusaanik oqallisiginnerusaarunnaarluta nunarsuaq tamakkerlugu qanoq iliuuseqarnissatsinnik oqaloqatigiilluta aallartiffitsitut, Naalagaaffiit Peqatigiinni silaannaap pissusaanik ilisimasallit oqarput.
Naalakkersuinermik suliaqartut, suliffeqarfissuarnik aqutsisut inuiaqatigiinnilu pisortat kajumissaarumavavut isumaqatigiissutigeqqullugu silaannaap allanngoriartornera ukiuni hunnorujulikkaani atukkatsinni unammilligassat annersarimmassuk. Uppernarsaatissat nerriviup qaaneereerput taakkualu uppernassusaat apeqquseqqittariaqanngilarput, ilisimasallit oqarput.
