Ilisimasalik: Ostermannip atorfinitsinneqarnera silatusaarnerunngilaq

Kaajallaasitaq nutaaq Naalakkersuisut siulittaasuannit, Aleqa Hammondimit, Naalakkersuisut Siulittaasuata Naalakkersuisoqarfiani pisortaamit,Svend Hardenbergimit aamma pisortamit Mininnguaq Kleistimit atsiugaq januaarip aallaqqaataani nalunaarutigineqarpoq.

Naalakkersuisut tamarmik immikkut siunnersuisussaminnik inuttassarsiorluni tamanut ammasumik allagarsiinngikkaluarluni atorfinitsitsisinnaasut kaajallaasitami allaqqavoq.

Esben Ørberg Danmarkimi Tusagassiortut Kaatuffiani siunnersortiuvoq Nunatsinni Danmarkimilu tusagassiortut sullitaralugit. Naalagaaffeqatigiiffiup iluanni immikkut siunnersuisunik atuineq, 2004-mi 2013-imilu ataatsimiisitaliami oqallisigineqarmat ilaavoq.

Kaajallaassitaq naalakkersuisunit sukkavallaartumik suliarineqarpoq atorfinitsitsinerlu silatusaarnerunngilaq, Esben Ørberg isumaqarpoq.

- Silatusaarnerunngilaq. Nangaanartoqartippara ilaqutarisanik salliutitsinermik eqqarsarnarsinnaannera pissutigalugu. Ataatsimut isigalugu attaveqatigiilluarsimarpasittoqanngilaq, Esben Ørberg oqarpoq.

Immikkut siunnersuisutut inuttassarsiorluni tamanut ammasumik allagarsiunngikkaluarluni Nunatsinni Danmarkimilu atorfinitsitsisoqarsinnaavoq, Esben Ørberg oqarpoq, taamaattorlu inatsisit malinneqarsimarpasipput. Taamaakkaluartoq sukkavallaarujussuartumik pisoqarsimavoq.

- Periaaseq Kalaallit Nunaanni taama nutaajutigisoq soorununa taama tuaviunneqartigisoq? Taamaaliornerup atorfinitsitsineq nangaanartoqartilerpaa.

Siunnersorti nassuiaavoq. Danmarkimi siunnersortaanermut isumaliutissiissusiortoqaraagat allanillu inatsisitigut allannguisoqartillugu, tamakku oqallisissanngortinneqaqqaartarput tusarniaassutigineqarlutillu, Kalaallilli Nunaanni tamakku kaajallaasitaliornikkut atuuttussanngortinneqartarlutik. Kaajallaasitallu atuutilerneranit sapaatip akunnera ataaseq qaangiutiinnartoq, Tom Ostermann Karl Lyberthip siunnersuisuatut atorfinitsinneqarluni.

Naalakkersuisut kaajallaasitaliaat misissoreerlugu, tamassuma ajoqutissartaqannginnera, Esben Ørbergip uppernarsarpaa oqarluni kaajallaasitaliaq Danmarkimi isumaliutissiissutinut, inatsisitigullu atuutsinneqalereersimasunut marlunnut assingusuusoq.

Immikkut siunnersortinut tunngasut inatsisit ukiortaamiillu atuutilersinneqartut sakkortuallaanngitsut, Esben Ørbergip oqaatigaa.

- Atorfinitsitsinermut killelersuineq taama annertutiginngilaq. Sulisoq sulititsisorlu suliffiup saniatigut kammagiissinnaapput aamma parteeqatigiissinnaallutik. Tamanna ajornanngilaq,

Danmarkimi Tusagassiortut Kaatuffianni siunersortsi, Esben Ørberg oqarpoq.

Naalakkersuisut siulittaasuata tusagassiutinut ullaaq manna nalunaarutigaa, immikkut ittumik tusagassiortunut katersortitsiniarluni nalunaaqutaq ataatsimut. Aggersaanerminili suna pineqarniarnersoq immikkut oqaatiginngilaa.

Naalakkersuisoq tunuartup siunnersuisuatut atorfinitsitaq Tom Ostermann, Karl Lyberth naalakkersuisutut suliunnaarnera pillugu ullut pingasuinnaat sulereerluni aamma tunuarpoq.