Ilisarnaatissaq unammisitsissutigineqalerpoq
Sisimiut Kommuneanni najugaqartut tamarmik, nunaqarfinni najugaqartut ilanngullugit, ilisarnaasiornissamut siunnersuuteqarsinnaapput.
Illorsuup aqqa, Taseralik, ilisarnaasiornermi pingaartinneqassaaq, inuppassuit katersuuttarfiattut kulturikkullu assigiinngitsorpassuartigut paarlaasseqatigiillutillu siaruartereqatigiiffiattut inissisimanera pingaartillugu siunnersuusiortoqartariaqarmat.
Kulturikkut illorsuassaq pillugu kommunalbestyrelsimi ataatsimiititaliaq partiinit tamaneersunik ilaasortaaffigineqartoq, ilisarnaatissamik toqqaaniarnermi aalajangiisuussaaq.
Ataatsimiititaliaq borgmester Hermann Berthelsenimit siulittaasuuffigineqarpoq.
Ilisarnaatissamik unammisitsinermi ajugaasoq 5.000 koruuninik akissarsitinneqassaaq, siunnersuullu kingusinnerpaamik januaarip 25-ianni Kulturip Illorsuanut nassiunneqareersimassalluni.
