Ilinniutit pillugit oqallinneq ingerlaqqippoq
Atuartitsinermi atortussat pillugit oqallinneq ingerlaqqippoq.
Demokraatit Tommy Marømut atuartitsinermi atortut kukkuneqannginnissaannik isumaginneqqusinerat ippassaq Radioaviisimi ilanngutereerippullu Radioaviisimi Ilinniusiorfimmi aaqqissuisumit Berit Mortensenimit pulaarneqarpugut.
Taassuma erseqqissarpaa Atlasini Ilinniusiorfiup saqqummersitaani pinngoqqaatit ilaat immikkut atuartitsissutigineqarneq ajortut, naak Jane Buus Sørensenip tamanna isornartorsioraluaraa. Aatsitassat ilaat Bauxit Atlasini ujaqqat aatsitassallit ilaattut ilanngunneqarsimavoq, tassa pinngoqqaatinut allanut, soorlu saviminermut, zinkimut, sølvimut kuultimullu ilaatillugu.
- Atuartitsissutissatut atortussat kukkuneqanngivissutut oqaatiginngilakka. Aamma kukkunerit pillugit paasitinneqartarnissarput kissaatiginaqaaq. Taamaattorli pineqartumi matumani kukkusoqarsimanngilaq. Taamatut allanneqartariaqarmat taama allassimavoq, Berit Mortensen oqarpoq.
Ilinniusiorfik atuartitsinermi atortussanik nutaanik saqqummersitsisarpoq, taakkunanilu kukkunerit amigaatillu aaqqinneqartartut Berit Mortensenip oqaatigaa.
