Ilinniartut statsministreimik naapisimaaqateqarnertik iluarisimaarpaat

Ilinniartut 140-t Atlantikup avannaanersuut danskit politikeriinik tusaamaneqarnerusunik naapeqateqarsimanertik iluarisimaarpaat.

-Ilimagisatsinnit pissarsiaqarneruvugut. Sakkortulaaraluarluni oqallinnerit pissarsiaqarnaqaat.

Savalimmiut inatsisartuini ilaasortaq Høgni Hoydal naapisimaareernerup kingorna naliliivoq. Atlantikup avannaamiunit Danmarki ”tiguarneqarmat” naapeqatigiinneq ammarlugu oqaaseqartuuvoq. Ilinniartut naapeqatigiinnermi peqataasut amerlassusaat naammagisimaarpaat, danskillu inatsisartuini suleriaaseq nassuiaatigineqarmat pissarsilluarnerarlutik.

-Namminersulernialernermi oqallinneq, pingaartumillu Free Association - Pituttorsimanngitsumik Suleqatigiinneq – aatsaat tusarpara, Danmarkimi ilinniartut peqatigiiffianni Avalammi siulittaasoq Parnuuna Egede oqarpoq.

Oqalugiartuni ersaattaanneqarnerpaavoq danskit statsministeriat Anders Fogh Rasmussen. Oqalugiareerluni tusarnaartut ilassiortorlugit assammeqattaarpai, apeqqutaallu akiortorlugit. Assersuutigalugu aningaasarsiornermi ilinniagalik Peter Christiansen, statsministerimut ima apeqquteqarpoq:

-Politikerit nunatta namminersulernialernanut suliaat naammappat, naapertuuppallu?

-Ajunngitsortaqarlunilu ajortortaqarpoq. Ilaasa oqallinnerit, piviusunngortitsinissaminngarnit pingaarnerusorivaat, statsminister Anders Fogh Rasmussen akissuteqarpoq.

Peter Christiansen-ip statsministerip akissutaa naammagalugulu naammaginngilaa, isumaqarami statsministeri isumaqatigiissutaareersut avaqqullugit oqaaseqarsinnaanngitsoq. Apeqqutiginiakkanili anngukkamiuk iluarisimaarlugu unnersiorpoq, taannamigooq siunertarigamiuk.