Ilinniartut qatserisartunut qujaniarput
Iqalunni Arctic College-imi ilinniartut qatserisartut qutsatissaqarfigaat, tassami ilinniartut ineqarfiat nunguilluni februaarip 26-ani ikuallappoq, inissiat katillugit 22-t nunguillutik ikuallallutik.
Qatserisartut annaassiniarnermi ikiuulluarput, ikuallarujussuartoqarneralu eqqarsaatigalugu tupinnaqaaq marluinnaat ajunaarmata, Canadamit ilanngutassiortorput Marianne Stenbæk allappoq.
Arctic College-imi ilinniartut arlallit qatserisartut qutsaviginiarlugit aaqqatit puisit amiinit mersukkat maanna tunissutigaat. Aaqqatit illugiit katillugit 15-it mersorneqarsimapput, Iqaluillu qatserisarfianni nalliuttorsiornerpalaartumik sapaatip-akunnerata siuliani tunissutigineqarlutik.
Arctic College-imi ilinniartitsisup Susan Enuaqqap oqaatigaa ilinniartuutimi ilaat arfinillit inigisartik pigisatillu ikuallannermi annaasimagaat, qatserisartullu tunissuteqarfigerusullugit maanna tassa iliuuseqartut.
- Qatserisartut amerlanerit namminneq kajumissutsiminnik sulipput, innuttaasullu tamanna ilaatigut puigortarpaat, iluamillu qutsavigineq ajorlugit. Qatserisartut suliaat pingaaruteqartoq takutinniarparput, qutsavigerusuppagullu, ilinniartitsisoq Susa Enuaraq CBC Northimut oqarpoq.
Inissiat 22-t nunguillutik ikuallammata ilinniartut katillugit 80-it angerlarsimaffeerupput.
Ilinniartullu Iqalunni qatserisartunut tunissuteqarniarnerat Iqalunni qatserisartut ittuata Barry Rodgersip nuannaarutigaa.
- Innuttaasut suliatsinnik qujamasunnertik qaqutikkut takutittarpaat, taamaammat ilinniartut uku tunissuteqarnerat nuannaarutigaarput, Barry Rodgers oqarpoq.
