Ataatsimeersuarneq: Ilinniartut Issittup siunissaa oqallisigissagaat
Ataatsimeersuarneq taaguuteqartinneqarpoq Model Arctic Council Greenland tassanilu ilinniagaqartut issittumi nunanut allanut naalakkersuisuusaarlutillu aalajangiisartuusaassapput.
Ilinniagaqartut Issittup siunissaanik takorluuinissamik peqataanissaat siunertarineqarpoq.
Ataatsimeersuarneq Inuit Ataqatigiit Folketingimi, Ilisimatusarfik suleqatigalugu aaqqissorneqarpoq, taama
oqaluttuarpoq Inuit Ataqatigiit Folketingemi ilaasortaatitaat Aaja Chemnitz Larsen tusagassiuutinut nalunaarummi.
Nunarsuarmioqatigiinnitsinni Issittumilu aammalu Issittumi Siunnersuisoqatigiinni peqatitut pingaaruteqartutut Kalaallit Nunaata siunissaanut nammineerluta akuunissarput pingaaruteqarpoq. Inuusuttut tassaapput siunissami Issittup siunissai taamaattumillu namminneerlutik ilusilersueqataassapput, Aaja Chemnitz Larsen Nuummi ataatsimeersuarnissaq pillugu taama oqarpoq.
Ataatsimeersuarnermi Model Arctic Council Greenlandimi pingaarnertut qulequtaritinneqarpoq Kalaallit Nunaanni Issittullu sinnerani imminut napatissinnaasumik aningaasaqarnikkut ineriartorneq qulequtarineqassaaq, ilaatigut FN-ip nunarsuaq tamakkerlugu anguniagaanik aallussisoqassalluni
Aammattaaq ilinniagaqartut nunat inoqqaavisa piginnaatitaaffiinut avatangiisinullu politikkimut apeqqutinik sammisaqartinneqassapput. Ataatsimeersuarneq ilinniagaqartunut tamanut ammasuuvoq.
