Ilinniartut ingerlaqqinnaveersut atuanngitsuungaatsiarnissaq aarleqqutigaat

Ilinniartut sinerissamut ilaquttaminnut juullisioriarlutik angalasut, maanna Air Greenlandimi timmisartortartut mattunneqarnerannut eqqugaasut ikinngillat. Ilinniarfigisaminnut utinngikkunik, anisitaasinnaannerat ilinniartut ilaannit aarleqqutigineqarpoq.

Eqqugaasunut ilaapput Niviaq Berthelsen aamma Miilu Jensen Nielsen, Nuummi Niuernermik Ilinniarfimmi NI-1-imi ilinniartut. Taakku Uummannamut juullisioriarlutik aallarput decemberip 20-iani, pilersaarutillu malillugit Nuummut januaarip qulingani utertussaagaluarlutik.

Niviaq Berthelsen aamma Miilu Jensen Nielsen. Nuummut uternissaminnut utaqqisinnaajunnaarsimasut misigissutsitik ima oqaatigaat.

- Nukillaajallannartorujussuuvoq, ingammik angerlarusulluni, Niviaq Berthselsen oqarpoq.

- Kamannartorujussuuvoq, nuanninngilaq avaanngunarpoq aallarsinnaannani Miilu Jensen Nielsen oqarpoq.

Piffissaq sivitsoriartortillugu, Uummannamiit aallarsinnaannginneq, eqqarsaatit assigiinngitsut pilersinneqarsimasut malunnarpoq.

- Inuttut isumaqarpunga, imminuinnaq eqqarsaatigivallaartut. Tassami inoqatinnguatik qanoq eqqornissaat eqqarsaatigeqqaarnagit mattussipput. Nalunngereerparpummi timmisartortartut qanoq atugarissaartigisut, inunnit allanit naleqqiullugit. Suliffigileramikkummi nalunngilaat qanoq inuuneqartussaallutik, namminermi timmisartortartuunissartik aalajangernikuuaat, Niviaq Berthelsen oqarpoq.

Miilu Jensen Nielsen, nangippoq.

- Iluaraluarpoq ilaquttat ilagalugit, kisiat aamma atuarnerput paarisussaavarput. Qimataarusunnanngeqaarmi, maanna aallarusoqaagut.

Niviaq Berthelsen aamma Miilu Jensen Nielsen sapaatit akunnerini marlunni atuanngitsoorunik Niuernermik Ilinniarfimminngaaniit anisitaariaannanngorsinnaapput. Niuernermik Ilinniarfimmiilli paasitinneqarpugut, atuarnermut agginngitsoorneq sumilluuniit peqquteqaraluarpat, anisitaanermik kinguneqarsinnaasoq. Immikkulli Niuernermik Ilinniarfimmi bestyrelsinut qinnuteqarnermi, uppe rnarsarsinnaagaanni peqquteqavilluni atuariariarsimannginneq anisitaannginnermik kinguneqarsinnaalluni.