Ilinniartunut tapiissutit 600.000 kr.-inik aningaasartallit
Aningaasaateqarfiup soqutigineqarnera suli annertuvoq, 150-it tapiiffigineqarnissamik qinnuteqarsimapput taakkunanngalu 70-it tapiiffigineqarsimallutik. Qinnuteqaatilli ilarpassui aningaasaateqarfiup siunertaata avataaniissimapput, aammalu ilarpassui Kalaallit Nunaannut attuumassuteqarsimanatik taamaattumillu aningaasaateqarfimmit tapiiffigineqarsinnaasimanatik, tapiiffigineqartulli amerleriarsimapput, 2011-mi tapiiffigineqartut 44-simapput.
Kalaallit Nunaanni ilinniartunut kalaallinullu nunani allani ilinniagaqartunut tapiisoqarpoq, aningaasaateqarfillu ataasiakkaanut annertuumik aningaasartalinnik tapiisimavoq aningaasartakinnerusullu arlaqarsimallutik, tapiissutillu assersuutigalugu ilinniartut qarasaasianik, atuakkanik allanillu pisiniarnissaannut atugassaapput. Pisuni ataasiakkaani ilinniartut nunani allani ilinniarnerminnut atatillugu ineqarnermut marloqiusamik akiliisartunut ilinniagaqarnermusiaminniillu ilaatigut Namminersorlutik Oqartussanit pissarsiarisaminnit tamatumunnga akissaqartitsinngitsunut aningaasaateqarfik ikiuisimavoq.
2013-imi kvartalimi siullermi aningaasaateqarfik aamma soqutigineqalaavissorsimavoq qinnuteqaateqartorpassuaqarluni. Aningaasaateqarfiullu siulersuisuisa upernaakkut ataatsimeeqqaarnerminni 35-inut tapiissuteqarfigaat.
Kalaallit ilinniagaqartut, pingaartumik nunani allani ilinniagaqartuusut, aningaasatigut ajornartorsiornerat ilinniakkaminnillu kinguaattooqqasarnerat ilinniartullu ilinniakkamik ingerlakkusutaminnik nassaannginnerminni ilinniakkanik arlalinnik aallartitsisimasarneri aningaasaateqarfiup maluginiarsimanerarpaa. Kalaallit Nunaat qaffasinnerusumik ilinniagaqarsimasunik pisariaqartitsivoq, soorlu ingeniørit, inatsisilerituut, økonomit, cand.merc.-it, nakorsat allallu. Tamannalu pissutigalugu aningaasaateqarfik ilinniakkat taakkartorneqartut iluinit ilinniartullu aningaasaateqarfiup tapiiffigisinnaasaanut maleruaqqusat iluaniittunit qinnuteqaatinik pissarsinissaminik soqutiginnippoq.
