Ilinniartorpassuit allagartartaarput
Nunatsinni ilinniartoqarfinni assigiinngitsuni maanna ulapaarfiuvoq, piffissammi taamalinerani ilinniakkaminnik naammassinnittut amerlasaqimmata.
Allattoq Jaaku Lyberth
juunip 10-at 2011 06:03
Ilaatigut Ilinniarfissuarmi ullumi ilinniartitsisut nutaat 25-t allagartartaartinneqassapput. Tamanna nalliuttorsiualaarnermi Ilinniarfissuup eqqaani timersortarfeeqqami ullaaq nalunaaqutaq qulinut pissaaq.
Piffissami tassanerpiaq Ilulisani Perorsaasunngorniat Ilinniarfianni Isumaginninnermik ikiortit 28-t, ukiuni marlunni sulinermik sungiusarlutillu ilinniarfimmi atuareerlutik allagartartaassapput.
Isumaginninnermi Ikiortinngortunut ulloq immikkut nuannersutut eqqaamaneqartussanngorpoq, tassami ukiup affaani ilinniarfimmeereerlutik maanna ilinniarsimanermut uppernarsaat nassarlugu ilaquttaminnut utersinnaanngoramik.
