Ilinniartoq: Ukiut 50-it sinnerlugit utaqqisariaqarsinnaavugut
Ukiulli 50-t sinnerlugit utaqqisariaqarsinnaavugut. Tassami nunatta karsia koruuninik ikinnerpaamik 8 milliardinik isertaqartalerpat aatsaat Danmarkimit tapiissutit pisariaqartinneqarunnaassasut, Ilisimatusarfimmi allaffissornermik ilinniagalik Lone Rosengreen Pedersen oqarpoq.
- Namminiilivinnissatsinnut soorunami aningaasaqartariaqassagatta Danmarkiminngaanniit isertartut 4 milliardi koruunit allanik taarserneqartariaqassapput. Aatsitassaninngaanniit isertitaqarsinnaavugut, soorlu 8 milliardi koruunit missaannik aatsaat isertitaqalerutta namminiilivissinnaanngussaagut, Lone Rosengreen Pedersen oqarpoq.
Ilisimatusarfimmi ilinniartoq isumaqarpoq ukiumut 8 milliardi koruuninik Nunatta karsia isertitaqartalerpat Danmarkiminngaanniit isertitat pisariaqartikkunnaarneqassasut.
- Nammineq aningaasaatigut atorlugit oqartussaaffiit nammineq ingerlassinnaanngussavagut, taamaattumik Naalakkersuisut siulittaasuata Hans Enoksenip nammineq 2019-imi soraarninngoruni Kalaallit Nunaata namminiilivissimanissaanik neriuutaa ilimaginngilara, oqarpoq nangillunilu.
- Naamik, uagut taanna piviusorsiorsorinngilarput, ullumikkutut inuunerput – levestandard – ingerlatiinnassagutsigu, aningaasarpassuit inuuniarnitsinni atukkavut taarteqartaqaramik.
Taamaammat namminiilivinnissaq ungasissorujussuartut isigaa.
- Ukiut 50 60-t ingerlaqqaassapput, immaqa aatsaat ukiut 65-70-t missaat qaangiuppata aningaasat tungaatigut namminiilivissinnaassaagut, Lone Rosengreen Pedersen oqarpoq.
Kalaallit Nunaata karsia ullumikkut ukiumut 3,2 milliardi koruuninik Danmarkimit tapiissutisisarpoq, taakku saniatigut Danmarkip sinerissamik alapernaarsuineq, politeeqarneq, eqqartuussiveqarneq allallu 800 milliioni koruuninik aningaasaliiffigisarpai.
Ilimmarfimmi ilinniartut marluk ilinniartitsisuatalu Namminersorneq pillugu isumaqatigiissut mississoqqissaareerlugu isumaliutersuutaat aqagu Sermitsiami saqqummersinneqassaaq.
