Ilinniartitsisut perorsaasullu: Ilaqutariit peqqissut qitiutittariaqarpaat
KNR-ip qinersinerup unnukkuani aallakaatitsinermini Ilinniartitsisut Meeqqat Atuarfianniittut Kattuffiata IMAK-ip siulittaasua Sivso Dorph aamma Perorsaasut Ilinniarsimasut Kattuffiata PIP-p siulittaasua Kaaliina Skifte pulaartoraat. Taakku meeqqat pillugit suliniutit pimoorullugit ataavartumillu suliniutiginissaat pisariaqalivissoraat, taamaammallu pingaartippaat naalakkersuisuutitaqalersussat ukiuni tulliuttuni sisamani ataavartumik suleqatigiissinnaanissaat.
- Aalajaatsunik naalakkersuisoqarnissaa pisariaqartilluinnarparput, Sivso Dorph aamma Kaaliina Skifte oqarput.
Meeqqat sumiginnagaasut ukiorpassuarni qineqqusaarutaajuarnerat naammalernerarpaat, ilaqutariillu peqqissut pilersinneqassappata maannangaaq aalajangersimasumik sulinissaq pisariaqalernerarlugu.
- Ilaqutariit atugaat pitsanngorsarneqartariaqarput, meeqqammi toqqissisimanngitsut atuarnerminni ilungersortitsisarput. Ilaqutariit siunnersorneqartalernissaat pingaarnerpaavoq, tassami meeqqat toqqissisimasumik inissisimanngikkaangamik eqqissiviitsunngortarmata, Sivso Dorph, IMAK-imi siulittaasoq oqarpoq.
Perorsaasuttaaq ukiorpassuarni meeqqat sumiginnakkat pillugit nilliaatitik tusarneqartariaqalersoraat.
- Suliniutinik pipallataanngitsunik, kisiannili nunamut tamarmut ataatsimoortumik suliniuteqalernissaq pingaarluinnarpoq. Taamaammat naalakkersuisoqatigiilertussat tassaasariaqarput ukiuni arlalinni aalajangersimasumik piviusunngortitsiviusumillu suleqatigiissinnaasut, Kaaliina Skifte PIP-p siulittaasua oqarpoq. Aamma kissaatigaat Ilaqutariissutsimut Peqqissutsimullu Naalakkersuisoqarfik ataatsimoorani tamarmik immikkut naalakkersuisoqalernissaat.
