Ilinniartitsisut kalaallisut oqaasillit Kommuneqarfik Sermersuumi amigaatigineqarput
Illoqarfinni pineqartuni pisut ajortut tusagassiuutini saqqummiunneqartarnerat ilinniartitsisut qinnuteqarnissaannut tunuarsimaartarput , Kommuneqarfik Sermersuumi atuarfeqarnermut immikkoortortaqarfimmi pisortaq Hans Peter Broberg oqarpoq.
- Illoqarfinni pineqartuni pisut tupannarsinnaasut aammalu "ajortut " ingerlaannaaq tusagassiuutini atuarfeqarfinnilu suaarutineqartarnerat pissutaagunarluni ilinniartitsisut illoqarfinni avinngarusimanerusunut nunaqarfinnullu qinnuteqarnissamut tunuarsimaartarput -, Hans Peter Broberg oqarpoq.
Illuatungaatigullu pisut ajunngitsut iluatsittullu suaarutigineqarneq ajorput, taamallutik tusaamanerluinerit qallinngortarlutik Konmuneqarfik Sermersuumi atuarfeqarnermut immikkortortami pisortaq oqarpoq. IIlinniartitsisut kalaallisut oqaasillit illoqarfinni avinngarusimasuni nunaqarfinnilu atorfinittut ajungitsorsiassaqartinneqartarput. Ukiumut ataasiarlutik sulinngiffeqarnerminni angalanissaannik akiliunneqartarput. Atorfininnermi aningaaserivimmi kontomik matoqqasumik pilersitsisoqartarpoq, aningaasat taakkua soraarnermi tiguneqarsinnaallutik, periarfissatut neqeroorut taanna ilinniartitsusut atorfnitsinniarnerinut iluatsissimmanngitsoq Hans Peter Brobergip nassuerutigaa.
Ilinniaritsitsisut kalaallisut oqaasillit Illoqarfinni avinngarusimanerusuni nunaqarfinnilu atorfininnissaannut kajumissaarniarlugit kommuneqarfik Sermersuumi paasissutissiisoqassaaq. Illoqarfinni nunaqarfinnilu ilinniartitsisut inissaat ajunngitsuunerat pitsaasunerat erseqqissaatigineqassaaq. Nunaqarfinni illoqarfinnilu pineqartuni innuttaasut inussiarnersuunerat najugaqarfigalugillu toqqissisimanartuunerat Kommuneqarfik Sermersuup paasissutissiinissami erseqqissarniarpaa.
-Ilinniartitsusunik ilinniarsimasunik ilinniartitsisoqannginnermi atuartut atuarfimmi ilikkagassaraluatik naammanngitsut angusarpaat- , Hans Peter Broberg oqarpoq.
Nunaqarfinni atuartut illoqarfinnut atuariartoraangamik, nunaqarfimmiut pisinnaasaat, illoqarfimmiunut naleqqiullutik appasinnerusarput, kommuneqarfik Sermersuumi atuarfeqarnermut immikkoortortami pisortaq oqarpoq. Illoqarfinni Illoqqortoormiuni Tasiilami atuartut, Nuummut ilinniariartortartut piginnaasaat appasinnerusarput, Hans Peter Broberg oqarpoq, tassumalu erseqqissatigaa, ilinniartitsunik ilinniarsimasunik ilinniartitsisoqarnissaq pisariaqavissoq.
Ilinniartitsisut ilinniarsimasut kalaallisut oqaasillit, Illoqqortoormiuni Tasiilami Paamiuni nunaqarfinnilu atorfininnissaannut kajumissaarilluni paasissitsiniaaneq Kommuneqarfik Sermersuup nittartagaatigut ukiamit ingerlanneqassaaq.
