Ilinniartitsisut angajoqqaallu akerliussutsimik takutitsilersut
- Paasisinnaanngilara sipaarniarnerup qanoq ilinniartitaanermut iluaqutaassanersoq, Mette Rasmussen Larsen oqarpoq. Taanna Ukaliusami marlunnik atuartuuteqarpoq, ilinniartitsisullu angajoqqaallu atuartuutillit akerliussutsimik takutitsinissaannut aaqqissueqataasuulluni. Taassuma aamma maluginiaqquaa meeqqat atuarfiannit anisut angusaluppallaarlutik anisarnerat maannakkut oqallisaammat.
- Meerartagut ajunnginnerusumik aallarnissaannut aningaasat pisariaqartinneqarput, taamaattumik neriuutigaara politikerit allanik sipaarniarfiusinnaasunik nassaarumaartut, Mette Rasmussen Larsen , Sermitsiaq.AG-mut oqarpoq.
Angajoqqaat kommunimit tusarniarneqarnikuunnginnerat, taassuma aamma tupigisuutigaa.
Kommuneqarfik Sermersooq atuarfeqarnermi sipaarniuteqarnialersoq, Radioaviisip qaammatip ataatsip matuma siornatigut ilanngutassiaraa, ilinniartitsisut ilinniaqqissinnaanissaat ilaatigut sipaarniarfigineqarniartoq ilanngutassiaralutigu, ilinniartitsisut ilaatigut isornartorsiugaannik.
Ukaliusami ilinniartitsisut, angajoqqaallu atuarfimmi pineqartumi atuartuutillit, sipaarniarnermut akerliussutsimik takutitsinerat, Ukaliusami sisamanngorpat ualikkut aallartissaaq.