Ilinniartitsisut aaqqiagiinngissutaaneranni meeqqat eqqorneqarput
- Timelærerit marluk marsip naanerani suliunnaarnissaminnik kissaateqarnerisa kingorna klasse ataaseq sapaatip akunnerani ataatsimi ulloq ataaseq atuartinneqarsinnaajunnaarpoq, Jørn Holbeck oqarpoq.
- Mattussisoqarnerata kingorna peqqussutaavoq allatut iliortoqarsinnaanngippat meeqqat nakkutigiinnarneqarnissaat, tassalu sunngiffimmi ornittakkat assigalugit taamaaliuinnartariaqassaagut, Jørn Holbeck oqarpoq.
Ilinniartsitsisut sulisitsisullu aaqqiagiinnginnerisa kinguneranik eqqugaasut siulliit ilaat tassaalerput, Tasiilami atuartut 5. klassit aamma 7. klassit. Aasamullu aaqqiisoqanngippat Tasiilami atuartut tamarluinnarmik eqqugaassapput. Tasiilami atuartut ullumikkut 440-upput.
- Neriuppunga aasartinnagu qanoq iliuuseqartoqassasoq, tassami maani atuarfimmi ilinniartitsisut qulingiluat aasamut aallartussaapput, allanillu taarserneqanngippata atuartitsinerput 20 procentimik appariassaaq. Tamannalu allanut sunniuteqarani meeqqat ilinniartsinneqarnerannut sunniuteqassaaq, Jørn Holbeck oqarpoq.
Jørn Holbeck ilinniartitsisut kattuffiannut ilaasortaavoq, ilinniartitsisullu atugaasa pitsanngortinneqarnissaat isumaqatigalugu, taamaakkaluartoq politikkikkut akulerunnissaq Jørn Holbeckip isumaqatigaa.
- Qanorluunniit pisoqaraluarpat tamanna meeqqat atugaasa ajorseriarnerannik kinguneqassanngilaq. Eqquisoqassappat atukkamikkut eqqorneqartussat tassaasariaqarput uagut inersimasut. Illuatungaanilli takusinnaakutsoorpara suliffitsinni atukkavut ajorseriarpata, taava ilinniartsitsisutut qinnuteqarniartut ikilissapput ingammik avinngarusimasunut, tamatumalu kingunissaa ataasiinnaavoq meeqqat inersimasullu tamarmik taava eqqugaassammata, Tasiilami atuarfiup pisortaa, Jørn Holbeck taama oqarpoq.
