Uummannami ilinniartitsisussaaleqineq angajoqqaajusumit arajutsisimaneqanngilaq, tamannalu iliuuseqarfigineqaqquaa.
Meeqqat atuarfimmiit freertiinnarneqaratik taartaasunit atuartinneqarsinnaanerat periarfissaasariaqartoq angajoqqaajusup, Uummannamullu nooqqammersup Karen Cortzenip ujartorpaa:
- Ilinniartitsisussaqanngikkallarnerani taartaasussat atuartitsinermi atorneqarsinnaagaluarput, Karen Cortzen oqarpoq, nangillunilu:
- Taartaasussanik nassaartoqarsinnaassanngippat arlaatigut sammisassaqartitsisoqarsinnaagaluarpoq meeqqat asuli angerlartiinnarnagit, Karen Cortzen oqarpoq.
Atuartut angajulliit allamik susassaqaratik angerlaannartartut Karen Cortzenip oqaatigaa, atuartullu 1.klasse-miit 5.klasse-meersut atuareersunut paaqqinnittarfimmi Inngerut-imi inissiinnarneqartartut aamma oqaatigalugu. Angajoqqaajusut allat qinikkallu ajornartorsiut aaqqiiviginiarlugu aamma iliuuseqartariaqartut Karen Cortzenip ujartorpaa:
- Angajoqqaajusut allat naammagittaannaleqqasutut nalilerusuppakka. Pissusissamisuuginnartutut tamanna isigiinnalersimavaat. Tupannarpoq maanga pilluni. Qinikkat iliuuseqartariaqarput, Karen Cortzen naggasiilluni oqarpoq.
