Ilinniartitsisusaqarniarneq Qaqortumi Tasersuup Atuarfiani ajornartorsiutaassanngilaq
Qaqortumi ilinniartitsisussaaleqineq annikillisarniarlugu, Namminersornerullutik Oqartussat, Danmarkimi sulisussanik pissarsiniarlutik takoqqusaaruteqarneranni, novemberimi pisumi, peqataasimanertik kommunip sulisoqarnermut pisortaata, Kim Dahlip, iluaqutaasimasutut aamma nalilerpaa. Taanna aamma atuarfiup pisortaa januuarimi februaarimilu Nuummiissimapput, ilinniartitsisunngorniat allallu soqutiginnittut oqaloqatigalugit soqutiginnilersinniarsimallugit. Aatsaallu taama Qaqortumi meeqqat atuarfianni ilinniartitsisoqarniarnikkut pitsaatigisumik ingerlasoqalersoq, Qaqortup kommuniani sulisoqarnermut pisortaq, Kim Dahl, unnersiorpoq.
Ilinniartitsisutut ilinniarsimasunit, 1300 missaannik atorfissaqartinneqartunit, nuna tamakkerlugu ukioq atuarfiusoq kingulleq 356-it amigaatigineqarput.