Ilinniartitsisoq: Atuarfitsialak ingerlallualeriartorpoq

Meeqqat atuarnerat aggustimi aallarteqqippat Atuarfitsialak ukiuni pingasuni ingerlareersimassaaq.

Atuarfitsialaap atuutilersinneqarneratigut meeraq qitiutillugu atuartitsineq ingerlanneqalerpoq.

Nutaamik ingerlaaseqalerneq iluatsissimanerluni? Iinniartitsisoq Lone Kokholm ima oqarpoq:

-Uanga isumaqarpunga ukua ukiut pingasut ingerlalluarsimasut, amerlanerni. Aamma ilinniartitsisut suleqatigiinnerunermikkut atuartunik aamma qitiutitsilluni ingerlatsineq iluatsilluarsimasoq. Assersuutigiinnarsinnaavara uagut atuarfitsinni Kangillinguit Atuarfianni atuarfiusoq una naalersoq immikkut nersornaatinik agguaassisoqarmat 1.-3. klassinut. Trin 1-imi naammassisut trintestit, misiligutit, pereernerisigut nersornaatinik tuniorarneqarput. Isumaqarpunga taassuma ersersikkaa pitsaasumik angusaqartoqarsimasoq.Lone Kokholm oqarpoq.

Pitsaanngitsunik eqqaasaqarsinnaanersoq aperigatsinni akivoq:

- Immaqa atuarfinni ataasiakkaani pitsaanngitsoqarsinnaavoq, atuarfinni ilinniartitsisunik amigaateqarfiusuni. Isumaqarpungali meeqqat atuarfeqarnerat tamaat isigalugu ingerlallualernersugut. Aallaqqaammut kukkutaakkat arlaqarsimassapput, ilinniartitsisussaaleqineq aamma pissutaalluni.

Sumiiffinni arlalinni arriinnerusumik ingerlasoqarsimassasoq ilimagivara. Kisianni aamma atuarfippassuarni suleqatigiilluarneq aallaaviulluni ingerlalluartoqarpoq. Neriunaatilerujussuuvoq.

Ilinniartitsisoq Lone Kokholm aamma oqarpoq atuarfimmit anisussat misilitsittarnissaannut nalunaarut ukiaru atuutilersussaq assut pissanganartikkitsik, meeqqat ilisimasamikkut killiffiat qanoq iliorluni paasineqarsinnaanersoq suli takorlooruminaammat.