Ilinniartitsisoq atoqatigiinnissamut saasaarisimasutut eqqartuussaasoq
Arnanillu 18-it inorlugit ukiulinnut ilinniartitsisinnaajunnaarsinneqarluni aamma aningaasanik 20.000 koruuninik narrunarsagaasimasumut taarsiisussanngortinneqarpoq.
Qasigiannguani atuaqatigiit kinguaassiutitigut pinerluutinut tunngasunik suliaqarnerminni politeeqarfimmut paasiniaanerat, ilinniartitsisup 29-nik ukiullip atuartitaminut 15-inik ukioqartumut atoqatigiinnissamut saasaarisimasutut politinit misissugaalerneranut aallarniutaavoq.
Atuaqatigiit kinguaassiutitigut pinerluutit pillugit politiinut apersuereersut, nivissat ilaat aperaaq,” qanoq iliortoqarsinnaanersoq ilinniartitsisoq atuartunut sms-inik allappat atoqatigerusullugit aamma kunissorusullugit?” Tassami niviarsiaqqat ilaat taamatut allaffigitissimammata. Politiit atuartunut ilisimatitsipput, tamanna pinerluttulerinermi inatsisinik unioqqutitsinerusoq, politiillu misissuinerat tassani aallartippoq.
Suliamullu tunngatillugu niviarsissat marluk apersorneqarput, ataaserlu nassuiaavoq ilinniartitsisoq marloriarluni atoqatigisarnikuusimallugu, soorlu atuarfimmi ilinniartitsisut inaanni aamma najugarisamini.
Politiit misissuinerminnut atatillugu Tele Greenlandimit paasissutissanik pissarsipput, taakkualu takutippaat ilinniartitsisup mobilianit atuartup mobilianut qaammatit sisamat ingerlaneranni sms-it 536-it missaanniittut nassiunneqarsimasut aamma pingasoriarluni sianertoqarsimasoq.
Suliaq Qasigiannguit Eqqartuussivianni 2011-mi suliarineqarpoq, tassanilu ilinniartitsisoq atuartitaminik atoqatiginninnissamut marloriarluni saasaarisimasutut qaammatini arfinilinni pineqaatissinneqarsimasunut inissiisarfimmiittussanngortinneqarluni eqqartuunneqarpoq.
Arnanillu 18-it inorlugit ukiulinnut ilinniartitsisinnaajunnaarsinneqarluni aamma aningaasanik 20.000 kpruuninik narrunarsagaasumut taarsiisussanngortinneqarpoq.
Ilinniartitsisorli pinngitsuunnerarpoq suliarlu Nunatta Eqqartuussisuuneqarfianut suliassanngorteqqillugu.
Eqqartuussinernilu tamani ilinniartitsisoq pinngitsuunerartarpoq, mobilikkut sms-it atuartitaminut nassiunneqartarsimasut nassuiaatissaqartinnginnerartarlugit, namminerooq nassiussaqartarnikuunnginnami.
Atuartitani atuarfimmi ilinniartitsisut inaanni naapissimannginnerarpaa atuartitamilu angerlarsimaffianut pulaarsimannginnerarlugu.
Qasigiannguani Eqqartuussivimmi inerniliineq Nunatta Eqqartuussisuuneqarfianit isumaqatigineqarpoq, uppernarsaatigineqartut allanik inerniliisitsisinnaanngimmata, eqqartuussissutigineqareersoq atuuttussanngortinneqarpoq.
