Ilinniarsimasut Danmarkimut noorartut

Kalaallit ilinniarluarsimasut ungasinngitsukkut Danmarkimut nuttut marluk suleqatitta naammattoorpai.

-Ikiortissaarukkama nuuginnartariaqarsimavunga, tusagassiortoq Karen Kleinschmidt oqarpoq. Taanna biilimik ajutoornermi kingorna tunusummigut, nakorsanit takuneqarsinnaanngitsumik piskesmældimik taaneqartartumik, anniartarpoq.

-Nakorsiaraluaraangama tusaajumaneqarneq ajorpunga, napparsimasut nunatsinni inissaqartinneqanngillat, taamaammat Danmarkimut nuuppunga, suliffittaarlungalu tusagassiortutut nalinginnarmik sivikinnerusumik sulisarlunga misiligummik, Karen Kleinschmidt oqarpoq.

-Oqartussanut maani saaffiginnikkama aatsaat inuttut pineqalersutut misigaanga, Karen Kleinschmidt oqarpoq.

Inunnik isumaginninnermik suliaqartoq ilinniarsimasorlu Bente Hegelund juulimi Københavnimut nuuppoq.

- Akimmisaartinneqartuartutut misigigama nuuppunga, Bente Hegelund oqarpoq. Taanna Namminersornerullutik Oqartussanit sooraarsitaanermi kingorna nuuttariaqartutut misigisimavoq.

- Inunnik immikkoortitsinerujussuaq isigisinnaajunnaarakku nuuppunga, taama oqarpoq maanna taartaalluni sulisartoq Bente Hegelund.