Ilinniarnissamut siunnersuineq pitsaanerusariaqarsoraat
Maren Ottar Hessner Danmarkimi efterskolet kattuffianni siunnersorti ima oqarpoq:
- Atuartut ukioq ataaseq anguniagaqaratik asiutissinnaasarpaat, naak siunnersorluarneqarnikkut efterskolep kingorna ilinniakkamik aallartitsisinnaagaluarlutik. Kalaallit Nunaanni efterskolertussat siunissartik pillugu siunnersorneqartarnerat ajorpallaaqaaq, siunnersorti oqarpoq.
Kalaallit Nunaanni meeqqat atuarfianni siunnersortit amigarpallaamik siunnersuisarnerat qaqutigoortunngitsoq aamma oqaatigaa.
-Siunnersuineq immaqa tamatigut pitsaanerpaaneq ajorsimavoq, tassami siunnersuisarnerup pitsaasuunissaa pingaartuuvoq, oqarpoq.
Danmarkimi efterskolertup Nanortalimmeersup Elisabeth Levisenip amigaat ilisinnaavaa, taanna efterskolernissamik siunnersortippoq, efterskolelli kingorna siunissami sunngorniarniissani pillugu siunnersorneqanngilaq.
- Naamik siunnersorneqanngilanga, ikiortinngikkuma naluara qanoq iliussanerlunga, Elisabeth Levisen Danmarkimi efterskolertoq oqarpoq.
Kalaaliaqqat efterskole naammassileraangamikku misilitsinnissaat piumasaqaataanngilaq.
-Aap tamanna ilumoorpoq, Efterskolet kalaaliaqqat pisariaqartitat tunniunniartussaavaat, kisianni atuartut efterskolemi misilitsinnissaat piumasaqaataanngilaq, Maren Ottar Hessner Danmarkimi efterskolet kattuffianni siunnersorti oqarpoq.
Siunnersuinerlu pitsanngorsarniarlugu suliniut ingerlanneqarpoq.
-Ilinniartitsisut, meeqqat atuarfianni siunnersuisartut, efterskolerusuttunut siunnersuinerminni atugassaannik DVD-mik, sananiarluta aniningaasanik maanna qinnuteqarpugut. Atuartut taamaalillutik efterskolerusukkunik, assersuutigalugu oqaatitsitigut sunik piumasaqaateqarnersoq nalunnginniassammassuk, aammalu efterskolet qanoq ittut iserfigineqarsinnaanersut nalunnginniassammassuk. Tassallu taamaalillutik atuartut efterskolenut naleqquttutut qinnuteqarsinnaalissapput, Danmarkimi efterskolet kattuffianni siunnersorti oqarpoq.
Atuartunik siunnersuinerup pitsanngorsarnissaanut suliniut nunatsinniit aningaasaliiffigineqarusunngilaq.
