Ilinniarnertuunngortut 200-nit amerlanerussapput

Inaarutaasumik misilitsinnerit angusiffiussappata, nunatsinni ilinniarnertuunngorniarfinnit pingasuusunit, ilinniarnertuunngorlutik nasartaartussat 238-t tungaannut amerlassuseqassasut naatsorsuutigineqarpoq. Ukioq ataaseq ingerlariaqqinnissamut pikkorissarnikut nasartaartussat ilagaat.
Allattoq Medea Frederiksen
juunip 17-at 2011 13:41

Aasianni avannaani ilinniarnertuunngorniarfimmit ilinniarnertuunngortoq siulleq ullumi nasartaareerpoq. Qeqqani Kujataanilu ilinniarnertuunngorniarfinniit ilinniarnertuunngortussat siulliit ataasinngorpat nasartaassapput.

Avannaani Kujataanilu ilinniarnertuunngorniarfinnit ilinniarnertuunngortussat amerlanerpaartaat, tassa tamangajammik, aasap kingorna ilinniaqqilernissamut qinnuteqareersut nalunaarutigineqarpoq.

Tamannali Qeqqani ilinniarnertuunngorniarfiani allarluinnaavoq. Ilinniarnertuunngortussat amerlanerpaartaat ilinnialeqqinnginnerminni atuanngiffeqaqqaarniarput.

Gitte Hertlingilli, Qeqqani ilinniarnertuunngorniarfimmi pisortap oqaatigaa ilinniarnertuunngortussat tamarmik aasap kingorna ilinnialeqqilernerlutik nalunaarutigineq ajoraat, ataasiakkaat ilinniarfitsik avaqqullugu nammineerlutik ilinnialeqqinnissamut qinnuteqaammik immersuisarmata.

HTX-imiit ilinniarnertuunngortussat amerlassusaat pissarsiarisinnaasimanngilagut.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq