Ilinniarnertuunngorniat silap pissusaata allanngoriartornera misissuiffigilerpaat

Silap pissussaata allanngoriartornerata kingunerisaanik ajornartorsiutit aaqqiissutissaanik nassaarniarlutik Danmarkimi Fynimi illoqarfimmi Faaborg-imi ilinniarnertuunngorniat upernaamut Kalaallit Nunaannukassapput, aviisi Fyns Stiftidende taamatut allaaserisaqarpoq.
Allattoq Jaaku Lyberth
januaarip 30-at 2009 16:23

Siunissami ajornartorsiutaasussat inuusuttut suliassaraat, taamaattumillu maannakkut allussereersimanissaat siunertaraarput annertunerusumik ilisimasaqareerniassammata, ilinniarnertuunngorniat ilinniartitsisuat Peter Eduard oqarpoq.

Ilinniarnertuunngorniat ilisimasassarsiorlutik angalanerminni immap, sikup, silap kiassusia ississusialu taamatullu aatsitassanik misissuissapput. Tamakku tamarmik misissorneqareerpata nunarsuarmi silap pissusaata allanngoriartornerata kingunerisaanik ajornartorsiutit aaqqiissutissaannik nassaarniartussaapput.

Faaborg-imi ilinniarnertuunngorniat Qeqertarsuup tunuanut upernaamut angalanissartik ullut 14-it sioqqullugit, ilinniarnertunngorniat atuarfianni atuaqatitik peqatigalugit silap pissusaa pillugu ataatsimeersuassapput, ataatsimeersuarnermilu Danskit avatangiisinut ministeriat Connie Hedegaard ataqqinaammik pulaartoriniarpaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq