Ilinniarnertuunngorniarfiit iluarsartuuteqqinniarpaat

Aaqqissuusseqqinneq pillugu ilisimatinneqarneq ajornertik, Nuummi ilinniarnertuunngorniarfimmi ilinniartitsisup Olav Henriksenip oqaatigaa:

- Aaqqissuusseqqinneq pillugu sulinermi peqataatinneqarnerunissarput soorunami kissaatigaarput, sapinngisarput naapertorlugu peqataatinneqarusukkatta, Olav Henriksen oqarpoq.

Ilinniarnertuunngorniarfinnik aaqqissuusseqqinnissaq pillugu siornatigut ataatsimiititaliortoqareerpoq, iluatsinngitsumilli.

Ataatsimiititaliap taassuma sulinera ukiuni arlalinni sulereerluni taamaatiinnarneqarpoq, aaqqissuusseqqinneq aappaagu aggustimit atuutilersinneqartussaagaluarpoq. Ilinniarnertuunngorniarfinnik aaqqissuusseqqinniarluni nutaamik maanna ataatsimiititaliortoqarpoq.

Ataatsimiititaliamut pineqartumut ilinniartitsisut peqataatinneqarnerunissaat neriorsuutigineqarpoq:

- Ilinniarnertuunngorniarfinnilli aaqqissuusseqqinnissaq pillugu suliat nutaat suunersut sukumiinerusumik paasisaqarfiginngilavut, Olav Henriksen oqarpoq.

Ilinniarnertuunngorniarfiit aaqqissuussiffigeqqinneqarnissaat pillugu ullumi ataatsimiittoqalerpoq, Kultureqarnermullu, ilinniartitaanermut, ilisimatusarnermullu naalakkersuisoqarfimmi pisortaq Lise Lennert Olsen oqalugiassaaq.

Ilinniarnertuunngorniarfiit sooq aaqqissuussiffigeqqinniarneqarnersut paasissutissiissutigineqassaaq, suliallu maannamut killiffia ilisimatitsissutigineqassalluni.

- Taamaalisoqareerpat ilinniarnertuunngorniarfiit nalilersorneqassapput, ilinniartullumi aamma. Misissuinerit inerneri pigineqarsimassappata takorusuppavut, nalilersueqataasinnaaniassagatta, oqallinnermullu akuulluta, Olav Henriksen sulisunut aamma sinniisuusoq naggasiilluni oqarpoq.

Ilinniarnertuunngorniarfiit aaqqissuussiffigeqqinneqarnissaat pillugu ataatsimeersuarneq tallimanngorpat naammassineqassaaq.