Ilinniarnertuunngorniaqatigiit: Ilinniakkaminnik taamaatitsiinnartartut imatut ikilisinneqassapput
Ilinniartut taamaatiinnartartut ikilisarniarlugit Ilinniartitaanermut Naalakkersuisoqarfiup suleqatigiissitaliaata ilinniarfiit septembarimi isumassarsiullaqqinneqqusaatsippai.
Ilinniarfiit arfineq pingasut peqataapput. Siunnersuutitsialappassuit akornanni suleqatigiissitap Sisimiuni 2.y GUX-imeersut akissarsitinneqartussatut toqqarpai, uniinnartarnermik ajornartorsiutaasunik sukumiisumik aaqqissuussamillu sulisimasutut nalilerlugit, Naalakkersuisoqarfik allappoq.
Suleqatigiit ataatsit inuusuttut 18-inik suli ukioqalersimanngitsut sammisimavaat, siunnersuutigalugulu ilinniartut nammineersinnaalernissaasa tungaanut angajoqqaarsiaqartinneqartassasut.
Suleqatigiit allat uniinnartarnermut pissutaasartut eqqarsaatigalugit ajornartorsiutaasartut ikiorneqarnissamullu neqeroorutaasareersut assigiinngitsut allaaseraat. Tamakku saniatigut ilinniagaqalersussat aasaanerani pikkorissartinneqartarnissaat siunnersuutigaat, angajoqqaattaaq peqataatillugit kiisalu qallunaatut piginnaasaat nukittorsarlugit, ilinniagaqartummi amerlasuut ilinniartitsinermut malinnaanissartik ajornartorsiutigisarmassuk.
Akissummut pitsaanerpaamut 2.y GUX-imi atuartut 10.000 koruuninik akissarsitinneqarput. Ilinniartut akissarsiatik nuannanniarluni aaqqissuussinernut atussanngikkaat taamaallaat piumasaqaataavoq.