Ilinniariartut inissaqannginnamik angerlamut utiinnartariaqartut
Ilinniariarlutimmi tikittut atuarfissaata Nuummi kollegianut allaffeqarfik pilersaarusioqatigisimanngilaa.
Radio aviisimi siusinnerusukkut ilanngutassiaraarput Aasianneersoq 17-inik ukiulik Aputsiaq Rafaelsen Olsen Nuummut ilinniariartorluni tikikkaluarami kollegiami inissaqartinneqanngitsoq akunnittarfimmullu inissinneqarsimasoq taamalu angerlamut uternissaanut bilitsimik tunineqartariaqarsimasoq.
Ajornartorsiut tamanna uteqqeqqunagu Inuussutissarsiornermut, Sulisoqarnermut, Inuussutissarsiutinullu Ilinniartitaanermut Aqutsisunit aaqqissorneqarpoq sapaatip-akunnerani 36-mi pisussamik suliniummik immikkut aaqqissuussisoqassasoq. Tassungalu kollegianik aqutsisoqarfik qaaqquneqarpoq, taamatuttaaq Naalakkersuisunut ilaasortaq Sivert K. Heilmann ilinniartitaanermut pilersaarummi nunatsinni pisariaqartitsinermut qanoq naleqqussaasoqarsinnaanersoq misissuisitsivoq
Ilinniartulli Saviminilerinermut ilinniarfiliartut kisimik kollegiamik inissaarutinngillat aammali Ilinniarnertuunngorniat atuarfiannut ilinniariartorniaraluartut taama misigisaqarput. Inuit 80-t Nuummi kollegiani inissaqartinneqanngitsut maanna utaqqisuniitsinneqarput.
